Marrëveshje për prodhimin e gjysmëpërçuesve – BE synon reduktimin e varësisë nga furnizuesit aziatikë
Arrihet marrëveshja në Parlamentin Europian për rritjen e prodhimit të gjysmëpërçuesve, thelbësorë për shumë industri strategjike si mjetet e transportit, makineritë industriale dhe mbrojtja. Qëllimi është të shmanget kriza e përjetuar vitin e kaluar me luftën në Ukrainë, pas pandemisë, duke reduktuar varësinë e brishtë nga furnizuesit aziatikë, veçanërisht nga kompanitë nga Kina dhe Tajvani që dominojnë tregun. Sipas zyrtarëve, qëllimi mbetet siguria se do të garantohet një nivel minimal i prodhimit të çipave në Bashkimin Europian dhe gjithashtu të bashkëpunohet ngushtë me partnerë me të njëjtin mendim.
Me aktin Chips, BE synon të dyfishojë pjesën e tij në tregun global, duke e çuar atë në 20 % në vitin 2030, me mbi 43 miliardë euro investime publike dhe private, duke katërfishuar prodhimin. Një hap vendimtar për zhvillimin e teknologjive inovative në një shkallë të gjerë. Kjo do të lejojë ribalancimin dhe sigurimin e zinxhirëve furnizues.
Legjislacioni europian për gjysmëpërçuesit do të forcojë konkurrencën dhe qëndrueshmërinë e Europës në teknologjitë dhe aplikimet e gjysmëpërçuesve dhe do të ndihmojë në arritjen e tranzicionit dixhital dhe të gjelbër.
Gjysmëpërçuesit janë asete strategjike për zinxhirët kryesorë të vlerës industriale. Mungesa globale e fundit e gjysmëpërçuesve ka çuar në mbylljen e fabrikave në një sërë industrish, nga automjetet tek pajisjet mjekësore. Kjo ka nxjerrë në pah varësinë ekstreme të zinxhirit global të gjysmëpërçuesve nga një numër shumë i kufizuar aktorësh në një kontekst kompleks gjeopolitik.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.