Masa sigurie për vajin e ullirit në Spanjë – Ndërsa 1 litër shitet deri në 14.5 euro, rriten rastet e vjedhjeve

Në Spanjë, prodhuesi më i madh i vajit të ullirit në botë, supermarketet po “kyçin” shishet e vajit në një moment që çmimet rriten në mënyrë të vazhdueshëm paralelisht me numrin e vjedhjeve.

Shishet një litërshe të vajit ekstra të virgjër të ullirit po shiten deri në 14.5 euro në disa supermarkete të vendit, duke bërë që vaji i ullirit të renditet në kategorinë e produkteve që pajisen me etiketa sigurie, si ato të kozmetikës, apo elektronikës.

Vetë supermarketet konfirmojnë se ka një rritje shqetësuese të vjedhjeve duke theksuar se vaji i ullirit është kthyer në një prodhim ideal për t’u grabitur.

Çmimet e vajit të ullirit, zyrtarisht në 8 euro për litër, janë rritur me 150% në dy vitet e fundit në Spanjë, pasi një thatësirë e pazakontë në jug të vendit ka dëmtuar rëndë mbledhjen e ullirit.

STC, një kompani spanjolle që ofron zgjidhje kundër vjedhjes për shitësit me pakicë, regjistroi një rritje 12-fish të porosive këtë verë nga supermarketet për pajisje për të mbrojtur shishet e vajit të ullirit. Policia spanjolle ka zbuluar gjithashtu vjedhjet e vajit të ullirit nga fabrikat dhe në tetor arrestoi dy persona si pjesë e një hetimi për vjedhjen e 56 ton vaj ulliri ekstra të virgjër.

Familjet në Spanjë zakonisht blejnë vaj ulliri me shumicë për gatim. Ndër konsumatorët më të mëdhenj në botë të vajit të ullirit, ata tashmë kanë reduktuar ndjeshëm përdorimin e tij. Vëllimet e shitjeve të vajit të ullirit ekstra të virgjër ranë me 17% në 12 muajt deri në shtator.

Në Spanjë, vjedhjet e sendeve me vlerë më të vogël se 400 euro nuk dënohen nëse nuk janë përsëritje. Hajdutët po përfitojnë nga numri më i ulët i stafit në dyqane.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.