Më pak grekë rrezikojnë varfërinë – Të ardhurat për frymë rikthehen në nivelet e vitit 2012

Pak më shumë se një në katër qytetarë në Greqi ishte në rrezik të varfërisë ose përjashtimit social në vitin 2022, një përqindje më e ulët se në vitin 2021 dhe natyrisht në krahasim me vitet e recesionit të thellë, kur raporti përkatës ishte pothuajse një në tre, sipas Autoriteti i Statistikave Greke – ELSTAT. Rreth 2.722.000 njerëz ishin në këtë situatë të pafavorshme.

Ata me një nivel të ulët arsimimi, gratë dhe të papunët janë tani më të rrezikuarit, madje edhe ata që nuk janë në mesin e shumë të varfërve janë kryesisht të paaftë për të përballuar aktivitetet e kohës së lirë ose për të ndjekur një hobi.

Shifrat e ELSTAT tregojnë gjithashtu se megjithëse indeksi i pabarazisë ekonomike ra në vitin 2022, pabarazitë vazhdojnë. Përqindja e popullsisë në rrezik nga varfëria ose përjashtimi social në vitin 2022 ra në 26.3%, nga 28.3% në vitin 2021. Kjo është përqindja më e ulët e periudhës 2015-2022, ndërkohë që rënia prej dy pikë përqindjeje krahasuar me vitin 2021 lidhet kryesisht me faktin që shifrat e vitit 2021 janë për të ardhurat e vitit 2020, të cilat u reduktuan për pjesën më të madhe të popullsisë për shkak të kufizimeve masive në aktivitetin ekonomik të shkaktuar nga bllokimet në vitin e parë të Covid-19.

Megjithatë, për një pjesë të popullsisë të ardhurat janë rritur pikërisht për shkak të pandemisë, pasi 14.6% e familjeve kanë deklaruar se të ardhurat e tyre janë rritur gjatë 12 muajve të fundit, 15% janë ulur, ndërsa për 70.4% të familjeve kanë mbetur të njëjta.

Pak më shumë se 26% deklaruan se arsyeja kryesore e rritjes ose uljes së të ardhurave ishte pandemia, nga të cilët 6.1% thanë se të ardhurat u rritën dhe 20% se u ulën. Përqindja e popullsisë në rrezik varfërie pas mbledhjes së pensioneve dhe përfitimeve llogaritet në 18.8%.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.