META zgjeron enkriptimin në Messenger – Projekti është i ngjashëm me modelin e WhatsApp

Meta bëri të ditur se telefonatat dhe bisedat personale të çdo përdoruesi të Messenger do të jenë të koduara si parazgjedhje, duke përfaqësuar një përditësim të madh të privatësisë që e bën shërbimin më të ngjashëm me WhatsApp.

Drejtuesja e Messnger, Loredana Crisan, sqaroi se falë teknologjisë së enkriptimit askush, përfshirë Metën, nuk mund të shohë se çfarë është dërguar ose thënë, përveç nëse vetë përdoruesi zgjedh të raportojë mesazhet e tij.

Crisan tha se do t’i duhet një kohë e papërcaktuar që Meta të kodojë të gjitha bisedat e Messenger dhe se kompania u mbështet në disa ‘parime kriptografike’ për të informuar strategjinë e saj, duke përfshirë një të zhvilluar brenda kompanisë dhe një tjetër që përdoret nga Signal, aplikacioni popullor i mesazheve të koduara.

Njoftimi i fundit i Metës për enkriptimin ka të ngjarë të shtojë një debat të vazhdueshëm që përfshin privatësinë dhe aftësinë e zbatimit të ligjit për të kryer hetime, siç u ilustrua në vitin 2016 kur Byroja Federale e Hetimit kërkonte që Apple të zhvillonte softuer për të ndihmuar më pas zhbllokimin e iPhone të të dyshuarve që ishin të përfshirë në të shtënat në San Bernardino, Kaliforni. Apple refuzoi të bashkëpunonte, duke thënë në atë kohë se të njëjtët inxhinierë që ndërtuan enkriptimin e fortë në iPhone për të mbrojtur përdoruesit, për ironi, do të urdhëroheshin t’i dobësonin ato mbrojtje dhe t’i bënin përdoruesit më pak të sigurt.

Kohët e fundit, drejtuesit në WhatsApp dhe Signal thanë se shërbimet e tyre nuk do të ishin më të disponueshme në Mbretërinë e Bashkuar nëse ligjvënësit miratonin ligje që do të dobësonin enkriptimin. Qeveria e Mbretërisë së Bashkuar pretendoi se shtytja e kriptimit të Metës do ta bënte më të vështirë zbulimin e aktiviteteve të abuzimit të fëmijëve në internet.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.