Nafta e nis javën në rritje të lehtë – Mbështetet nga dobësimi i dollarit dhe nga rritja e kërkesës në Kinë
Nafta po qëndron në rritje të lehtë në sesionin e sotëm, ndërsa fitimet po kufizohen nga problemet që po shfaqin disa banka në SHBA. Edhe rimëkëmbja e kërkesës në Kinë dhe dobësimi i dollarit amerikan po mbështesin çmimet.
Nafta Brent e Londrës po tregtohet në rreth 83 dollarë për fuçi, ndërsa nafta Bruto amerikane po tregtohet në rreth 77 dollarë për fuçi. Analistët shprehen se, besimi i tregjeve është i brishtë sepse ka dyshime mbi rrugën që do të ndjekë Rezerva Federale me rritjen e interesave.
Në anën tjetër, një dollar më i dobët i bën lëndët e para të denominuara në monedhën e gjelbër më të lira për zotëruesit e monedhave të tjera. Tregu ka gjetur një mbështetje nga deklarata e shefit ekzekutiv të Saudi Aramco, Amin Nasser, i cili tha se kërkesa nga Kina po rimëkëmbet ndjeshëm.
Komentet vijnë përpara njoftimit se Rihadi dhe Teherani zyrtar kanë rënë dakord të rikthejnë marrëdhëniet diplomatike, një marrëveshje e ndërmjetësuar nga Kina. Investitorët po presin edhe të dhënat mbi rezervat e naftës në SHBA, që do të publikohen më vonë gjatë kësaj jave, dhe të dhënat mbi inflacionin që publikohen të mërkurën.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.