Nafta, e qëndrueshme pranë 83 USD – Parashikohet rritje e çmimeve në javët në vijim

Tregu i naftës po shfaqet i qëndrueshëm në sesionin e sotëm, pasi investitorët po presin procesverbalin e takimit të fundit të Rezervës Federale në SHBA. Në sesionin e kaluar, çmimet u mbështetën nga optimizmi për përmirësimin e kërkesës dhe nga shqetësimet që kanë të bëjnë me furnizimin e tregut. Nafta Brent e Londrës po tregtohet në rreth 83 dollarë për fuçi, ndërsa nafta Bruto amerikane po tregtohet në rreth 77 dollarë për fuçi.

Me importet që pritet të arrijnë një nivel rekord në Kinë gjatë vitit 2023 dhe me rritjen e kërkesës në Indi, analistët presin që kërkesa globale do të arrijë në rreth 101 milionë fuçi, gjatë këtij viti. Gjithashtu, tregjet presin që çmimet të kenë një tendencë në rritje në javët në vijim, për shkak të tkurrjes së furnizimit.

Rusia planifikon të ulë prodhimin me 500 mijë fuçi naftë në ditë gjatë muajit mars, e barabartë me rreth 5% të totalit të prodhimit, në shenjë hakmarrje ndaj vendimit të perëndimit për të vendosur tavan mbi çmimet.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.