Nafta, e qëndrueshme pranë 85 USD – Investitorët, të fokusuar te efektet e vendimit të OPEC+ për të ulur prodhimin

Nafta po ndryshon minimalisht gjatë sesionit të parë të kësaj jave, ndërsa investitorët janë të fokusuar te efektet që do të japë vendimi i OPEC+ për uljen e prodhimit, në një kohë që ekonomia globale po ngadalësohet, duke dëmtuar edhe kërkesën për naftë. Nafta Brent e Londrës po tregtohet në rreth 85 dollarë për fuçi, ndërsa nafta Bruto amerikane po tregtohet në rreth 80 dollarë për fuçi.

Të dyja kontratat publikuan fitime për të tretën javë me radhë, gjatë javës së kaluar, si një reagim i investitorëve ndaj vendimit të OPEC+ për të ulur prodhimin edhe me 1.16 milionë fuçi në ditë. Pas këtij vendimi, Arabia Saudite, që është eksportuesja më e madhe e naftës në botë, rriti çmimin e naftës bruto për klientët e saj në Azi dhe në Shtetet e Bashkuara.

Kompania shtetërore Aramco njoftoi disa klientë aziatike se do të vijojnë të marrin porositë e plota, pavarësisht vendimit për uljen e prodhimit. Njëkohësisht, investitorët po ndjekin edhe bisedimet mes Irakut dhe Kurdistanit, për të rifilluar eksportet e naftës, që u ndërprenë javën e kaluar.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.