Nafta, e qëndrueshme pranë 85 USD – Mbështetet lehtë nga rënia e rezervave në SHBA javën e kaluar

Nafta po qëndron në rritje në sesionin e sotëm, për shkak të rënies së rezervave të naftës në SHBA dhe vendimit të OPEC+ për të ulur prodhimin deri në fund të këtij viti. Nafta Brent e Londrës po tregtohet në rreth 85 dollarë për fuçi, ndërsa nafta Bruto amerikane po tregtohet në rreth 81 dollarë për fuçi.

Të dhënat jozyrtare të publikuara në Instituti Amerikan i Naftës treguan se rezervat e naftës bruto në SHBA ranë me 4.3 milionë fuçi, gjatë javës që u mbyll më 31 mars.

Megjithatë, investitorët po presin të dhënat zyrtare që publikohen më vonë gjatë ditës së sotme, nga Administrata për Informimin mbi Energjinë. Gjatë kësaj jave, çmimet e naftës janë rritur ndjeshëm për shkak të vendimit të Organizatës së Vendeve Eksportuese të Naftës dhe aleatëve të tjerë, me në krye Rusinë, për të ulur prodhimin edhe me 1.16 milionë fuçi naftë në ditë.

Në total, OPEC+ i ka ulur kuotat e prodhimit me 3.66 milionë fuçi naftë në ditë, e barabartë me 3.7% të kërkesës globale. Në anën tjetër, fitimet janë kufizuar nga të dhënat e publikuara në SHBA, që treguan se aktiviteti i manifakturës në SHBA ra në nivelin më të ulët në 2 vitet e fundit, gjatë marsit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.