Nafta ngjitet sërish pranë 85 USD – Mbështetet nga pritshmëritë se Kina mund të ofrojë stimuj ekonomikë

Nafta po qëndron në rritje në sesionin e sotëm, për shkak të pritshmërive se Kina do të ofrojë stimuj për ekonominë, por edhe për shkak të rënies së rezervave në SHBA. Nafta Brent e Londrës po tregtohet pranë 85 dollarëve për fuçi, ndërsa nafta Bruto amerikane po tregtohet në rreth 80 dollarë për fuçi.

Të dhënat e publikuara në Kinë treguan se inflacioni konsumator gjatë marsit preku nivelin më të ulët që nga shtatori i vitit 2021, duke sugjeruar se kërkesa vijon të jetë e dobët. Por, në anën tjetër këtu të dhëna mund ta detyrojnë Pekinin zyrtar të ofrojë stimuj për të mbështetur rimëkëmbjen e ekonomisë së dytë më të madhe në botë.

Gjithashtu, një mbështetje të lehtë çmimet po e gjejnë edhe nga dobësimi i dollarit amerikan, që i bën lëndët e para të denominuara në monedhën e gjelbër në të lira për zotëruesit e monedhave të tjera. Javën e kaluar, çmimet e naftës u rritën me mbi 5% për shkak të vendimit të OPEC+ për të ulur prodhimin edhe me 1.16 milionë fuçi, deri në fund të këtij viti.

Investitorët po presin edhe të dhënat mbi inflacionin në SHBA për marsin, që do të publikohen të mërkurën.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.