Nafta, pranë 85 USD për fuçi – Mbështetet nga njoftimi i Rusisë për të ulur prodhimin gjatë marsit

Nafta po qëndron në rënie të lehtë në sesionin e parë të kësaj jave, ndërsa të premten u rrit me rreth 2%, për shkak se Rusia njoftoi që do të ulë prodhimin. Gjithashtu, edhe sezoni i mirëmbajtjes së rafinerive në Azi dhe Shtetet e Bashkuara mbështeti çmimet. Rusia, që është prodhuesi i tretë më i madh i naftës në botë, njoftoi se do të ulë prodhimin me 500 mijë fuçi gjatë marsit, e barabartë me rreth 5% të prodhimit të saj, në shenjë hakmarrjeje ndaj vendimit të Bashkimit Europian dhe G7-ës për të vendosur tavan mbi çmimet.

Nafta Brent e Londrës po tregtohet në rreth 85 dollarë për fuçi, ndërsa në sesionin e kaluar u rrit me 2.2%. Nafta Bruto amerikane po tregtohet në rreth 79 dollarë për fuçi, pas rritjes me 2.1% të premten. Të dyja kontratat fituan rreth 8% të vlerës në sesionin e kaluar, për shkak edhe të optimizmit për rimëkëmbjen e kërkesës në Kinë. Për shkak të këtyre zhvillimeve, analistët parashikojnë se nafta Brent mund të rritet drejt 100 dollarëve për fuçi, por gjithçka do të varet edhe nga hapi i rimëkëmbjes së kërkesës në Kinë.

Në Shtetet e Bashkuara, që është prodhuesi më i madh i naftës në botë, numri i puseve operative u rrit me 10 njësi gjatë javës së kaluar. Në tregun e metaleve të çmuara, ari po tregtohet në rreth 1870 dollarë për onz, ndërsa argjendi po tregtohet në rreth 22 dollarë për onz.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.