Nafta rritet pranë 85 USD për fuçi – Mbështetet nga vendimi i OPEC+ për të ulur prodhimin

Nafta ka vijuar tendencën në rritje edhe në sesionin e sotëm, pas vendimit të OPEC+ për të ulur më tej kuotat e prodhimit. Tashmë investitorët po fokusohen te ndikimi që do të kenë çmimet më të larta të naftës në ekonominë globale.

Nafta Brent e Londrës po tregtohet në rreth 85 dollarë për fuçi, ndërsa nafta bruto amerikane po tregtohet në rreth 80 dollarë për fuçi. Të dy bençmarkët u rritën me mbi 6% në sesionin e kaluar, pasi Organizata e Vendeve Eksportuese të Naftës dhe aleatët e tjerë, duke përfshirë Rusinë, vendosën të ulin prodhimin edhe me 1.16 milionë fuçi naftë në ditë.

Në total, organizata pritet ta ulë prodhimin me rreth 3.66 milionë fuçi naftë në ditë, e barabartë me rreth 3.7% të kërkesës globale. Analistët parashikojnë se, në terma afatmesëm kërkesa për naftë do të vijojë rritjen, sidomos gjatë stinës së verës, duke shtuar më tej presionet inflacioniste.

Për këtë arsye, çmimet e naftës mund të rriten deri në 100 dollarë për fuçi në fund të këtij viti. Megjithatë, gjatë sesionit të sotëm fitimet po kufizohen nga ngadalësimi i aktivitetit të manifakturës në SHBA.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.