Ndryshoi politikën dhe Italinë – Ndahet nga jeta në moshën 86-vjeçare Silvio Berlusconi

Silvio Berlusconi u nda nga jeta në spitalin San Raffaele të Milanos. Ish-kryeministri i Italisë, lideri i Forza Italia dhe themelues i Mediaset ishte 86 vjec. Berlusconi ishte shtruar sërish në spital të premtën e kaluar, pasi kaloi më parë 45 ditë atje për shkak të pneumonisë dhe leucemisë.

Berlusconi fitoi gjatë jetës së tij aq shumë pushtet, sa që momenti i vërtetë magjik, i cili duhet mbajtur mend, është ai kur e humbi atë pushtet.

Italia ishte në një situatë të keqe për shkak të sulmeve të tregjeve ndaj borxhit publik të vendit. Merkel dhe Sarkozy qeshnin publikisht me ‘të. Europa kishte frikë se mos fundosej bashkë me Italinë. 8 deputetë ish besnikë, e tradhtojnë kavalierin me një votim përfundimtar duke bërë që të humbiste mazhorancën në parlament.

Por ai rezistoi dhe nuk hoqi dorë, as nuk u dorëhoq si kryeministër. Por telefonata e djalit të tij që punonte në Londër i cili i tha se nëse Italia rrëzohej, të njëjtin fat do të kishin dhe kompanitë e familjes, e bindën të largohej nga pushteti.

Dimensioni ‘ më i madh se jeta’, jashtë të zakonshmes, në spektrin human dhe politik të kavalierit është i gjithi në momentin kur u largua përgjithmonë nga kryeministria.

Kjo sepse Berlusconi ishte një fenomen: vullnet për pushtet por dhe domosdoshmëri historike. Në të mirë dhe në të keq ai mbetet themeluesi i një të djathte të re dhe një politike të re, me ambicie liberale dhe pamje populiste, që u bë një model për t’u ndjekur në botë dhe dominoi skenën italiane për 20 vjet, edhe kur ishte në opozitë. Dhe që përfundoi sërish me ‘të, aq sa për të fituar sërish iu desh të ndryshonte lëkurë, gjini dhe moshë duke u mishëruar tek Giorgia Meloni, antropologjikisht e kundërta e tij.

Kundërshtarët e tij e kanë akuzuar për cdo krim të mundshëm. Dhe fakt është që ai u përball me shumë procese gjyqësore, më shumë se 20. Ai u shpall i pafajshëm pothuajse për të gjitha akuzat. Sipas ligjit italian Berlusconi ka kryer vetëm një krim: evazion fiskal, për të cilin dhe u dënua dhe i kushtoi vendin në senat.

Shumë njolla errësuan jetën e tij publike. Origjina e kapitaleve me të cilat Berlusconi nisi aktivitetin e tij si sipërmarrës është ende një mister. Por megjithatë bilanci përfundimtar i Berlusconit si politikan nuk është negativ për shkak të gjitha gjërave që kërcënoi se do të bënte, apo atyre që nuk bëri dot. Por vetëm për faktin se nuk bëri atë që kishte premtuar. Kryeministri më jetëgjatë i Italisë la në letër ‘revolucionin liberal’ të përbërë prej më pak taksash dhe më shumë rritje, premtim që e coi në krye të qeverisë.

Ai nuk pranoi asnjëherë idenë e ndërtimit të një pasaardhësi duke eliminuar politikisht të gjithë nxënësit e tij më të mirë, duke cuar drejt fundit në këtë mënyrë krijesën e tij, Forza Italia. Berlusconi kishte gjithcka në dorë për të ndryshuar Italinë: Konsensus, sukses, forcë, para dhe pushtet, por nuk ia doli.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.