“Ngadalësohet” ekonomia e Kosovës – Rritja reale në tremujorin e dytë ishte vetëm 2%
Aktiviteti ekonomik në Kosovë, sipas vlerësimeve të Agjencisë së Statistikave, ka shënuar rritje reale prej vetëm 2% në tremujorin e dytë të këtij viti. Ndikimin më të madh në këtë ngadalësim e kanë dhënë eksportet neto, ndërkohë që konsumi dhe investimet kontribuuan pozitivisht në rritjen reale të Prodhimit të Brendshëm Bruto.
Konsumi ka shënuar rritje prej 3.7%, për shkak të zgjerimit të së remitancave, kredive konsumatore, por edhe ngadalësimit të rritjes së çmimeve të konsumit. Investimet shënuan rritje prej 2%, si rezultat i shtimit të investimeve publike, por edhe kredive për këtë zë. Për sa i përket tregtisë së jashtme, eksportet neto kanë thelluar deficitin tregtar me 6.7% si rezultat i rritjes së importit të mallrave dhe shërbimeve prej 6.3%, ndërsa eksporti i mallrave dhe shërbimeve ka shënuar rritje më të ngadaltë me 5.9%.
Zgjerimi i Prodhimit të Brendshëm Bruto në tremujorin e dytë të vitit është mbështetur kryesisht nga rritja e vlerës së shtuar në sektorin e aktiviteteve financiare dhe të sigurimit, sektorin industrisë përpunuese, bujqësisë, tregtisë, etj. Aktiviteti ekonomik u reflektua në rritjen e numrit të ndërmarrjeve të regjistruara, kryesisht në sektorët e tregtisë, prodhimit, ndërtimit dhe hotelerisë.
Parashikimet e Bankës Qendrore të Kosovës për gjysmën e dytë të vitit 2023 sugjerojnë për një rritje të ekonomisë prej 3.7% në tremujorin e tretë dhe 4.3% në tremujorin e katër. Investimet e përgjithshme, konsumi public, si dhe eksporti i shërbimeve, i ndërlidhur me shpenzimet e diasporës, pritet të jenë shtytësit kryesor të rritjes. Ndërsa, pritjet për rënie të eksportit të mallrave do të ndikojnë negativisht aktivitetin e përgjithshëm ekonomik.
Dorian Koça/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.