Oxfam: 5 burrat më të pasur në botë dyfishojnë pasurinë e tyre ndërsa 60 % e më të varfërve humbasin para!

Një përqendrim i fuqisë globale të korporatave dhe monopolit po kontribuon në thellimin e pabarazisë që po i bën më të pasurit më të pasur dhe më të varfrit më të varfër.

Pesë njerëzit më të pasur në botë kanë më shumë se dyfishuar pasurinë e tyre që nga viti 2020, ndërsa 60 për qind më e varfër kanë humbur para, sipas një raporti të Oxfam të publikuar të hënën në Davos, Zvicër, ku po mbahet Forumi Ekonomik Botëror vjetor (WEF).

Sipas të dhënave nga kompania kërkimore Wealth X, pasuria e kombinuar e Elon Musk, Bernard Arnault, Jeff Bezos, Larry Ellison dhe Mark Zuckerberg, pesë njerëzit më të pasur në botë,  është rritur me 423.8 miliardë euro (464 miliardë dollarë), ose 114 % që nga viti 2020.

Brenda të njëjtit hark kohor, 4.77 miliardë njerëzit më të varfër në botë kanë humbur 0.2 % në terma realë të pasurisë së tyre.

Kjo do të thotë se ndërsa miliarderët e botës ishin 3 trilionë euro (3.3 trilionë dollarë) më të pasur në 2023 se në 2020 me pasurinë e tyre që po rritej tre herë më shpejt se norma e inflacionit, pothuajse pesë miliardë njerëz janë varfëruar.

Sipas rrjetit ndërkombëtar, hendeku i madh midis të pasurve dhe të varfërve ka të ngjarë të vazhdojë të rritet, duke çuar në krijimin e trilionerit të parë në botë brenda një dekade. Varfëria botërore, nga ana tjetër, nuk do të zhduket para 230 vjetësh, vlerëson Oxfam.

Pabarazia ekzistuese është pjesërisht për shkak të përqendrimit të pushtetit në duart e atyre që kanë interes të bëjnë fitime maksimale për veten e tyre në vend që të rishpërndajnë pasurinë midis punëtorëve dhe shoqërisë.

Sipas raportit të Oxfam, shtatë nga dhjetë korporatat më të mëdha në botë kanë ose një CEO miliarder ose një miliarder, ndërsa 1 përqindëshi më i pasur në botë zotërojnë 43% të të gjitha aseteve financiare globale.

Po ky 1% më i pasur emeton po aq ndotje karboni, në nivel global, sa dy të tretat më të varfër të njerëzimit. Gjithashtu, jo rastësisht njerëzit më të pasur në botë janë të gjithë burra. Sipas Oxfam, në mbarë botën burrat zotërojnë 95.9 trilionë euro (105 trilion dollarë) më shumë pasuri se gratë.

Rrjeti vlerëson se do të duheshin 1200 vjet që një punëtore femër në sektorin shëndetësor dhe social të fitojë atë që një CEO në kompanitë më të mëdha të Fortune 100 fiton mesatarisht në një vit.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.