Paralajmërimi i Italisë: Kujdes nga hakerat! – Sulmet synojnë cënueshmërinë e serverave të tyre
Mijëra serverë kompjuterësh në mbarë botën kanë qenë objektiv i një sulm hakerimi ransomware që synoi serverët VMware ESXi. Lajmi u konfirmua nga Agjencia Kombëtare e Sigurisë Kibernetike e Italisë – ACN – e cila paralajmëroi organizatat që të ndërmarrin veprime për të mbrojtur sistemet e tyre.
Sulmi i hakerave synoi të shfrytëzonte një dobësi të softuerit, sipas drejtorit të përgjithshëm të ACN, i cili shgtoi se sulmi ndodhi në një shkallë masive.
Një zëdhënës i VMware tha se kompania ishte në dijeni të incidenteve dhe se kishte lëshuar paralajmërime për cënueshmërinë dyvjeçare që po shfrytëzohet nga hakerat duke filluar që nga shkurti 2021, duke u kërkuar klientëve të saj të aplikojnë patch-in nëse nuk e kanë bërë këtë.
Serverët kishin rënë prehë e sulmeve të hakerave edhe në vende të tjera europiane si Franca dhe Finlanda, si dhe në Shtetet e Bashkuara të Amerikës dhe Kanada.
Sipas mediave italiane dhjetra organizata vendase janë prekur nga sulmet kibernetike dhe shumë të tjera u paralajmëruan të marrin masa për të shmangur mbylljen jashtë sistemeve të tyre. Klientët e Telecom Italia raportuan probleme me internetin më herët të dielën, por dy çështjet nuk besohet të kenë lidhje. Zyrtarët amerikanë të sigurisë kibernetike thanë se po vlerësonin ndikimin e incidenteve të raportuara.
Agjencia e SHBA për Sigurinë Kibernetike dhe Sigurinë e Infrastrukturës theksoi se po punon me partnerët e sektorit publik dhe privat për të vlerësuar ndikimet e këtyre incidenteve të raportuara dhe për të ofruar ndihmë aty ku është e nevojshme.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.