Pastrimi i parave, Shqipëria kaloi testin e Moneyval – Irena Binjaku: Përmbushëm standardet e kërkuara

Në raportin e fundit të mekanizmi të Këshillit të Europës për pastrimin e parave, theksohet se Shqipëria ka bërë hapa pozitive për rregullimin dhe mbikqyrjen e noterëve dhe agjentëve të pasurive të paluajtshme. Irena Binjaku, këshilltare e ministrit të Drejtësisë dhe përgjegjëse e monitorimit të sektorit imobiliar, tha për Scan Update se, detyra e kësaj ministrie e dhënë nga Moneyval, u përmbush. Por sipas saj, tregu do të jetë në inspektime të vazhdueshme.

“Si fillim ne na mjafton një notë e mirë, pozitive,  që na vjen nga Moneyval. Patjetër që  do vazhdojmë që standarti jonë të mbetet ai që është arritur deri tani.

Nuk do lejojmë askënd që ta shohë ndërmjetësin e pasurive të paluajtshme, si një profesion per pastrimin e parave dhe financimin e  terrorizmit.

Në 2018 ne kemi marrë rekomandimet nga Moneyval në lidhje me rekomandimet e bëra për të rregulluar, tregun tonë.

Patjetër që e kemi arritur me miratimin e ligjit në janar të vitit 2022 dhe jemi duke permbushur standartet  dhe detyrimet që kërkon Moneyval nga  Shqipëria dhe Ministria e Drejtësisë në rastin konkret, pasi është autoriteti korrigjues në tregun e  imobiliarëve ose agjentëve të ndërmjetësimit të pasurive të paluajtshme” deklaroi ajo.

Shqipëria pritet të raportojë pas 2 vitesh në MONEYVAL për progresin e mëtejshëm të bërë drejt forcimit të sistemit të saj të parandalimit të pastrimit të parave dhe financimit të terrorizmit. Në vitin 2018, Shqipëria, sëbashku me disa vende të tjera të Europës u përfshi në listën e vendeve në monitorim.

Këtyre vendeve iu dhanë disa rekomandime për t’u përmbushur dhe pothuajse çdo vit janë publikuar raporte për ecurinë e tyre. Në bazë të raporteve, të viteve 2019, 2021 dhe 2022, janë dhënë edhe rivlerësimet përkatëse për secilin rekomandim ku është konstatuar progres. Në këtë rast, sikurse evidenton raporti i Moneyval, brenda 3 vitesh “Shqipëria ka arritur pritshmëritë duke adresuar shumicën e mangësive”.

Blerta Lata/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.