Pensioni maksimal në Greqi, mbi 5 mijë euro – Rritja e përgjithshme me 3.1% do jetë në nivel kombëtar

Tavani i pensioneve në Greqi pritet të vendoset në 5.119 euro nga 1 janari, pasi rritja me 3.1% e pensioneve kryesore të parashikuara në projektbuxhetin e vitit 2024, do të jetë në nivel kombëtar duke përfshirë dhe gjashtë raste të tjera të pensioneve. Kështu, nga 1 janari 2024, pensioni kombëtar do të shkojë në 426.58 euro, duke u rritur me gati 13 euro krahasuar me 413.76 që është aktualisht.

Sipas ligjit grek, shuma totale bruto e çdo pensioni kryesor mujor ose më shumë se një pension për shkak të pleqërisë, invaliditetit ose vdekjes nuk mund të kalojë 12-fishin e pensionit kombëtar që i korrespondon 20 viteve sigurim, d.m.th. 4 965.12 euro bruto. Pas rritjes së pensionit kombëtar, tavani për pensionet e larta apo të shumëfishta do të jetë 5118.96 euro.

Gjithashtu në një pikë që prek dhe shumë shqiptarë, pensioni i plotë kombëtar i emigrantëve 413.76 euro për vitin 2023, jepet vetëm për ata që kanë 30 vjet qëndrim të ligjshëm dhe të përhershëm në Greqi, duke filluar nga viti 1992.

Duhet theksuar se në bazë të planifikimit rritje deri në 3.1% të pensioneve të tyre kryesore do të kenë afërsisht 1.5 deri në 1.7 milionë pensionistë. Ndërkohë janë edhe rreth 750 mijë pensionistë që nuk do të kenë rritje, pasi ruajnë një diferencë të konsiderueshme personale përballë pensioneve minimale. Megjithatë, ata do të marrin, si përfitim të jashtëzakonshëm, një diferencë personale, nga 100 deri në 200 euro, ndoshta pak para Krishtlindjeve.

Dorina Kurtaj /SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.