Përgjegjësit për shumicën e emetimeve të CO2 – 57 prodhues dhe shtete. Shumica, në karburantet fosile dhe çimento

Nga viti 2016 deri në vitin 2022, 57 njësi ekonomike duke përfshirë firma shtetërore dhe kompani në pronësi të investitorëve prodhuan 80% të emetimeve të dioksidit të karbonit në botë, nga karburantet fosile dhe prodhimi i çimentos. Të dhënat dalin nga raporti i Carbon Majors, një shoqatë jofitimprurëse.

Tre kompanitë më të mëdha në botë që emetojnë dioksid karboni në këtë periudhë janë firma shtetërore e naftës Saudi Aramco, gjigandi shtetëror energjetik i Rusisë Gazprom dhe prodhuesi shtetëror Coal India, thuhet në raport.

Raporti zbuloi se shumica e kompanive kishin zgjeruar prodhimin e tyre të karburanteve fosile që nga viti 2015, vit kur pothuajse të gjitha vendet nënshkruan Marrëveshjen e Parisit të OKB-së, duke u zotuar të ndërmarrin veprime për të frenuar ndryshimet klimatike.

Që atëherë, ndërkohë që shumë qeveri dhe kompani kanë vendosur objektiva më të ashpra të emetimeve dhe kanë zgjeruar me shpejtësi energjinë e rinovueshme, ato gjithashtu kanë prodhuar dhe djegur më shumë lëndë djegëse fosile, duke shkaktuar rritjen e emetimeve.

Emetimet globale të dioksidit të karbonit të lidhura me energjinë arritën një rekord të lartë vitin e kaluar, sipas Agjencisë Ndërkombëtare të Energjisë. “InfluenceMap” tregoi se një grup relativisht i vogël emetuesish ishin përgjegjës për pjesën më të madhe të emetimeve të vazhdueshme të dioksidit të karbonit dhe synonte të rriste transparencën rreth së cilës qeveritë dhe kompanitë po shkaktonin ndryshimin e klimës.

Një botim i mëparshëm i bazës së të dhënave ‘Carbon Majors’ u citua muajin e kaluar në një çështje ligjore të ngritur nga një fermer belg kundër kompanisë franceze të naftës dhe gazit TotalEnergies. Fermeri argumentoi se si një nga 20 kompanitë më të mëdha në botë që emetojnë dioksid karboni, TotalEnergies ishte pjesërisht përgjegjëse për dëmtimin e operacioneve të tij nga moti ekstrem. Baza e të dhënave u lançua për herë të parë në vitin 2013 nga organizata jofitimprurëse kërkimore Climate Accountability Institute.

Ajo kombinon të dhënat e vetëraportuara të kompanive për prodhimin e qymyrit, naftës dhe gazit me burime si Administrata e Informacionit të Energjisë në SHBA, shoqatat kombëtare të minierave dhe të dhëna të tjera të industrisë.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.