Programi ekonomik i “Fratelli d’Italia” – Propozimet e Giorgia Melonit për përballimin e krizës së kostos së jetesës

Italianët do të zgjedhin qeverinë e re të dielën e 25 shtatorit. Vëmendja kryesore është përqendruar tek programet ekonomike të kandidatëve në momentin që e gjithë bota po përballet me krizën e kostos së jetesës.

Plani i një prej kandidateve kryesore, Giorgia Meloni e Fratelli d’Italia, quhet “Gati për të ringritur Italinë”, dhe përbëhet nga 25 pika. Temat e prekura janë të shumta që nga reforma fiskale, bonusi i bebeve deri tek përditësimi i planit kombëtar të rimëkëmbjes dhe rezistencës.

Vetë Meloni e cila synon postin e kryeministres, zgjedh ta quajë “Plani i fluturimit”, pasi sipas saj në një plan të tillë vendoset objektivi, zgjidhet rruga dhe përgatitet nisja. Sipas konservatorëve italianë, burimet e fondeve europiane dhe të planit kombëtar të rimëkëmbjes duhen përdorur në mënyrë më efikase. Objektivi kryesor është mbështetja e fuqisë blerëse të italianëve dhe sistemit sipërmarrës në vend. Një pikë tjetër ka të bëjë me punësimin e të rinjve dhe një pension i denjë për të moshuarit.

Për sa i përket bonusit të bebes dhe mbështetjes së familjes, një nga propozimet është futja progresive e koeficientit familjar: pra një sistem taksimi që merr në konsideratë numrin e anëtarëve të familjes. Gjithashtu sipas këtij programi, shteti do të ndihmojë me 300 euro në muaj për vitin e parë të jetës së cdo fëmije dhe 260 euro në vitin e dytë deri në moshën 18 vjec. Ndër propozimet e bëra nga partia e Melonit janë edhe ato që kanë të bëjnë me shtëpinë. Është e nevojshme – thuhet në dokument – “të alokohen më shumë burime në Fondin e Garancisë për blerjen e banesës së parë për çiftet e reja që kanë një punësim jo të sigurtë. Asnjë taksë e re për shtëpinë e parë dhe zero taksa për 100 mijë eurot e para për blerjen e banesës së parë.

Objektivi i Fratelli d’Italia është përditësimi i përqendruar i planit kombëtar për rimëkëmbjen dhe rezistencën, përballë krizës së shkaktuar nga lufta në Ukrainë dhe rritjes së cmimeve të lëndëve të para, duke rimodeluar burimet italiane. Synimi më i rëndësishëm është siguria energjitike në mënyrë që vendi të jetë i pavarur nga gazi rus, dhe qytetarët të mos vuajnë reduktimin apo ndërprerjen e energjisë.

Gjithashtu propozohet dhe një një pakt tatimor për vendin. Ulja e barrës tatimore për bizneset dhe familjet përmes një reforme që synon barazinë: zgjerimi i taksës së sheshtë duke hequr TVSH për ata që faturojnë deri në 100 mijë euro xhiro. Taksë e sheshtë propozhet dhe për rritjen e të ardhurave krahasuar me vitet e mëparshme, me perspektivë zgjerimi të mëtejshëm për familjet dhe bizneset.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.