Punësimi në Eurozonë rritet ndërsa PBB-ja tkurret!

Shifrat e BE-së dhe zonës së euros për produktin e brendshëm bruto (PBB) dhe punësimin mbeten relativisht të qëndrueshme për tremujorin e tretë të 2023 krahasuar me tre muajt e mëparshëm, sipas të dhënave nga Eurostat.

Një vlerësim i shpejtë i publikuar nga organi statistikor i BE-së të martën tregoi se PBB-ja në zonën e euros, e cila përbëhet nga vendet anëtare të Bashkimit Europian që kanë adoptuar euron si monedhën e tyre, u tkurr me 0.1% në tremujorin e tretë (TM3) krahasuar me periudhën e mëparshme tre mujore.

Ajo shënon tkurrjen e parë që nga viti 2020. Shifra erdhi gjithashtu në përputhje me pritjet e tregut dhe pasoi një rritje tremujore prej 0.2% në tremujorin e dytë (TM2) të këtij viti.

Ndërkohë, PBB-ja në BE ka mbetur e qëndrueshme krahasuar me tremujorin e mëparshëm.

Eurostat publikoi edhe një krahasim me Shtetet e Bashkuara, ku PBB-ja e tremujorit të tretë 2023 u rrit me 1.2% krahasuar me tremujorin e mëparshëm.

Krahasuar me tremujorin e dytë të këtij viti, numri i njerëzve që punojnë në BE u rrit me 0.2%, dhe 0.3% në zonën e euros.

Të dhëna të ngjashme krahasuar me të njëjtën kohë të vitit të kaluar treguan një rritje prej 1.4% të normës së punësimit në eurozonë dhe një rritje prej 1.3% në BE.

Në përgjithësi, situata ekonomike në BE dhe eurozonë është lehtësuar në vitin 2023 krahasuar me vitin e kaluar. Efektet e krizave energjetike dhe ekonomike të shkaktuara nga lufta e agresionit të Rusisë kundër Ukrainës po lehtësohen.

Për më tepër, rritja e normave të inflacionit po stabilizohet, me një normë 2.9% për tetorin 2023 në eurozonë, nga 4.3% në shtator – që shënoi shifrën më të ulët që nga tetori 2021.

Norma e inflacionit në eurozonë u regjistrua në 10.6% në tetor 2022, nga 9.9% në shtator.

Vlerësimet parashikojnë që inflacioni të rritet përkohësisht dhe rritja të mbetet e dobët për pjesën e mbetur të vitit 2023.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.