Qendrat e emigrantëve, jo më parë se 10 nëntori – La Repubblica: Ishin parashikuar të hapeshin më 20 maj. Kosto, mbi 1 mld euro

Fillimet e punimeve në 23 mars, dorëzimi pritet pas 233 ditësh, pra më 10 nëntor. Gjithshka bëhet me dije në vendimin e Ministrisë italiane të Mbrojtjes që u besoi inxhinierëve ushtarakë ndërtimin e qendrave për emigrantët në Shqipëri. Por, sipas synimeve të kryeministres Giorgia Meloni, qendrat në Shëngjin dhe Gjadër, duhet të kishin hapur dyert në datën 20 maj.

Italiania “La Repubblica” në një shkrim të gjatë, vë theksin në faktin se qeveria Meloni përgënjeshtron veten, për faktin se qendrat që do të presin emigrantët nuk do të hapen deri në në nëntor të këtij viti.

Në portin e Shëngjinit dhe në ish-bazën ushtarake të Gjadrit, punimet janë në hapat e parë, shkruhet më tej. Po kryhen inspektime, që po nxjerrin në pah edhe një sërë vështirësish në zonë. Është e pamundur që qendrat të jenë gati deri në maj, do të duhen muaj, duhet të kalojë e gjithë vera. “Dhe, përtej propagandës qeveritare, dokumentet e para zbulojnë bllofin e operacionit, kostot e të cilit vazhdojnë të rriten dhe rrezikojnë të arrijnë shifrën monstruoze të një miliardë eurosh në pesë vjet.

Sepse shifrave zyrtare, tashmë shumë të larta, të cilat arrijnë në rreth 150 milionë euro në vit shumëzuar me pesë vjet, duhet t’i shtohen edhe kostot e për transportin dhe kujdesin shëndetësor dhe, për sa i përket strukturave, nënkontraktat “pa kufij shpenzimesh”, nënvizohet në vendimin e Ministrisë së Mbrojtjes”, theksohet më tej në shkrim.

Gjithashtu, kostot e ndërtimit të dy qendrave, ajo e pritjes në portin e Shëngjinit dhe kampit në Gjadër duhet të konsiderohet një buxhet shtesë. Punimet që u janë besuar inxhinierëve do të kushtojnë rreth 65 milionë euro, fonde që pjesërisht janë marrë nga një projektligj që ka të bëjë me përdorimin e fondeve të Planit Kombëtar të Rimëkëmbjes dhe Rezistencës, siç nënvizuan përfaqësuesit e opozitës.

“Çdo ditë që kalon bllofi i marrëveshjes Itali-Shqipëri bëhet gjithnjë e më i qartë – thotë Matteo Mauri, i cili ndoqi punën në komisionin për protokollin e Shqipërisë. Kostot rriten çdo muaj. Në një dekret të marsit shtuan edhe 65 milionë euro të tjera, duke kaluar tavanin prej 700 milionë. Një shumë joproporcionale parash për të bërë diçka krejtësisht të padobishme”.

Në ditët në vijim Ministria e Brendshme në Itali do të hapë tenderin 36 milionë euro për menaxhimin e qendrave. Në shqyrtim janë ofertat e tre kompanive të përzgjedhura nga tridhjetë pjesëmarrësit.

Ende për t’u shpallur është tenderi për furnizimin me module parafabrikate që do të vendosen në zonat kur inxhinierët dhe nënkontraktorët të kenë përfunduar gërmimin, rikuperimin, ndërtimin e kanalizimeve dhe sistemeve, pa kufi shpenzimesh.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.