Qeveria e re e Malit të zi – Analistët: Pavarësisht përbërjes, do të jetë e brishtë!

Analistët janë të bindur se lëvizja e qendrës “Europa tani”, e cila fitoi zgjedhjet e parakohshme në Malin e zi, do të ‘lodhet’ për të formuar një qeveri të qëndrueshme. Sipas tyre paqëndrueshmëria politike në Mal të Zi ka të ngjarë të vazhdojë pavarësisht fitores së saj. Kjo pasi qeveria e ardhshme do ta ketë të vështirë të sigurojë mbështetje të fortë në parlament.

“Europa tani” doli e para me 25.6% të votave në zgjedhjet parlamentare të së dielës, por do të ketë nevojë për mbështetjen e partive të tjera të ish-bllokut qeverisës për të siguruar një shumicë. Një nga arsyet se pse nuk pritet një qeveri e qëndrueshme politike në Mal të Zi, është sepse shumica e re qeverisëse do të përbëhet nga shumë parti. Nëse shtohen problemet ekonomike në vend dhe betejat e mundshme brenda blloqeve politike, mund të priten zgjedhje të parakohshme brenda të paktën dy viteve.

Blloku opozitar i udhëhequr nga “Partia Demokratike e Socialistëve”, DPS, e cila u largua nga pushteti në vitin 2020 pas tre dekadash sundimi të pandërprerë, doli i dyti me 23.8  %. Pro-serbja “Për të Ardhmen e Malit të Zi” fitoi 14.7%, ndërsa koalicioni i “URA” dhe “Malit të Zi Demokratik”, i kryesuar nga kryeministri në largim Dritan Abazovic dhe ish-kryetari i parlamentit Aleksa Becic, mori 12.3%. Partia Boshnjake mori 6.9 %, ndërsa Forumi Shqiptar, Aleanca Shqiptare, Nisma Qytetare Kroate dhe Partia Popullore Socialiste pro-Serbe kaluan të gjithë pragun për të hyrë në parlament.

Që nga shtatori i kaluar, “Europa tani”, e udhëhequr nga ish-ministri i Financave Milojko Spajiç, u shfaq shpejt si një yll politik në rritje, duke u fokusuar në ekonomi dhe reforma. Tetorin e kaluar, ajo fitoi garat për kryetar bashkie në kryeqytetin Podgoricë dhe në qytetin e Danilovgradit, ndërsa më 2 prill kandidati i saj, nënkryetari i lëvizjes, Jakov Milatovic, fitoi zgjedhjet presidenciale. Spajiç tha se lëvizja e tij do të negociojë për një qeveri të ardhshme me të gjitha partitë që ndajnë vlerat e tyre politike, duke theksuar se blloku i udhëhequr nga DPS dhe lëvizja qytetare URA nuk do të jetë pjesë e shumicës së re.

Nga ana e tij Abazovic u përgjigj se blloku i tij do të jetë shtylla kurrizore e qeverisë së re, duke paralajmëruar se shumica e re nuk do të jetë e qëndrueshme nëse kjo gjë nuk ndodh. Gjatë fushatës zgjedhore, udhëheqësi i URA-s dhe kryeministri në largim Abazovic pretendoi se themeluesi i arratisur koreano-jugor i kriptomonedhës së shembur Terra, Do Kwon, financoi ilegalisht fushatën elektorale të “Europa tani”. Kjo e fundit do të përpiqet të shmangë qeverisjen së bashku me partinë e Abazovicit për shkak të mosmarrëveshjeve gjatë fushatës elektorale. Por gjasat janë që Spajiç të tërheqë deklaratat e tij dhe të përfshijë partinë e Abazovic në qeveri, nëse do të dojë të krijojë një të tillë.

Sipas Kushtetutës, parlamenti i ri duhet të konstituohet më pak se 15 ditë pas publikimit të rezultateve zyrtare të zgjedhjeve, që është deri në fund të qershorit. Kryeministri i emëruar duhet të propozohet brenda 30 ditëve pas konstituimit të parlamentit, pra në fund të korrikut. Kryeministri i emëruar ka tre muaj kohë për të propozuar qeverinë ose për të shkuar në zgjedhje të parakohshme. Negociatat për një qeveri të re mund të jenë të gjata dhe të vështira, pasi “Europa tani” ka një përgjegjësi të madhe sepse ka edhe presidentin e shtetit dhe kryeministrin e mundshëm.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.