Rikthehet prerja e pyjeve, kryesisht në Gjirokastër e Kukës – Prokuroria ka rritur numrin e procedimeve dhe të dënimeve, 58% me arsim deri 9-vjeçar

Viti i shkuar ka kthyer fenomenin e prejes së paligjshme të pyjeve. Është Prokuroria e Përgjithëshme e cila raporton se procedimet për këtë vepër penale në vitin 2022 është rritur me rreth 32% krahasuar me një vit më parë, ose shifra më e lartë në 5 vitet e fundit. Nga 148 procedime për Neni 205 të Kodit Penal Prerja e paligjshme e pyjeve në vitin 2021, procedimet janë rritur në 169 për vitin e shkuar. Rritje ka shënuar edhe numri i të dënuarve, i cili rezuton 51 në vitin 2022 nga 34 një vit më parë.

Pesha specifike që zë kjo vepër penale në grupin e veprave penale “Kundër mjedisit” për vitin 2022 është 52,69 %, ndërsa në vitin 2021 është, 47,13 %.

Nga të dhënat statistikore vërehet tendenca në rritje e procedimeve të regjistruara për veprën penale të parashikuar nga neni 205 i Kodit Penal “Prerja e paligjshme e pyjeve”, në vitin 2022 prej 32,43 % në krahasim me vitin 2021.

Nga një analizë që i bën Prokuroria e Përgjithëshme profilit të përgjegjësve, mësohet se Meshkuj madhorë janë, 98,7 % e të pandehurve; me arsim deri 9-vjeçar janë 58 %; të papunë janë 59,2 %; përsëritës për të njëjtën vepër janë 1,46 % dhe 5,84 % janë përsëritës për vepra të tjera.

Numri më i lartë i procedimeve për vepra penale kundër mjedisit, është regjistruar në prokurorinë e shkallës së parë Tiranë me 16 %, ndërkohë që koeficienti më i lartë për 100,000 mijë banorë rezulton në qarqun Gjirokastër me 47 procedime dhe qarkun Kukës me 41 procedime.

Për këtë grup veprash, në kërkesat lidhur me llojin e masën e dënimit, të kërkuar nga prokurori, rezulton se 38,96 % e kërkesa kanë qenë për dënimin me gjobë dhe 61,04 % për dënimin me burg, ku është kërkuar aplikimi i pezullimit të dënimit dhe vendosja në provë për 91,5 % të rasteve. Gjykata ka vendosur në 41,09 % të dënimeve dënimin me gjobë dhe në 58,91 % dënimin me burg, ku në 90,7 % të rasteve është pezulluar vendimi i dënimit me burgim dhe i pandehuri është vendosur në provë. Në 1 rast është vendosur pushim çështje dhe 5 raste pafajësi.

Lorenc Rabeta /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.