Rritja e pagave mbështet rimëkëmbjen, por krijon probleme – Produktiviteti nuk po zgjerohet. Rritjet e mëtejshme dëmtojnë konkurrencën

Rimëkëmbja ekonomike e Europës po nxitet nga të ardhurat më të larta dhe rritja e pagave të punëtorëve, megjithëse në vendet ku popullsia në plakje po shteron fuqinë punëtore, politikëbërësit mund të përballen me sfida të reja. Presionet afatshkurtra të pagave mund të kombinohen potencialisht me ngurtësinë afatgjatë të tregut të punës për të nxitur inflacionin.

Pas dy vitesh dobësim të fuqisë blerëse, nuk është për t’u habitur që punëtorët në Kontinentin e Vjetër kërkojnë paga më të mira. Pagat nominale janë rritur me 4.5% në Eurozonë dhe më shumë se 10% kudo në Europë në gjysmën e parë të 2023 – shit. Përmirësimi i të ardhurave po i lehtëson familjet nga presionet nga rritja e kostove të jetesës dhe po mbështet rritjen ekonomike. Por produktiviteti i përmirësuar së bashku me politikat e rrepta monetare, të cilat pengojnë kompanitë të kalojnë kostot tek konsumatorët, janë jetike për ekonomitë që të përballojnë pagat më të larta pa inflacion në rritje.

Natyrisht, mënyra se si rriten pagat e punëtorëve ndryshon nga vendi në vend. Në veçanti në ekonomitë e përparuara europiane, pagat do të duhet të forcohen më tej për të ruajtur ritmin me çmimet – që do të thotë se presioni në rritje do të vazhdojë. Në Europën Qendrore, Lindore dhe Juglindore rritja e pagave u tregua më e shpejtë dhe e ndjekur nga çmimet. Ky rajon ka pasur rritje të lartë të pagave në të kaluarën, por përsëri atëherë rritja ekonomike ishte e fortë. Sot, përkundrazi, është anemike.

Për më tepër, vlerësohet se presionet mbi pagat nuk pritet të ulen së shpejti. Tendencat afatgjata tashmë po zvogëlojnë fuqinë punëtore ekzistuese. Faktorët demografikë dhe ditët e shkurtuara të javës bëjnë që punëdhënësit të përballen me një konkurrencë të paimagjinueshme dhe kur gjejnë staf të kualifikuar të interesuar, u paguajnë atyre një pagë bujare për t’i mbajtur ata. Gjatë dhjetë viteve të fundit në Europë, pjesëmarrja e punonjësve është rritur relativisht shpejt. Sot, edhe nëse situata vazhdon, oferta e punës mund të ulet me 0.1% në vit dhe në një horizont pesëvjeçar për shkak të plakjes dhe një jave katërditore pune.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.