Rumania rrit pensionet me 40% – E njëjta shumë për personat që kanë bërë të njëjtën punë

Pensionet në Rumani do të rriten në shtator 2024 me një mesatare prej 40%. Faza e parë parashikon indeksimin e pesë milionë pensioneve në janar me 13.8 %, sipas projektligjit, që qeveria do të dërgojë në parlament deri në fund të muajit.

Pagesa e pensioneve, sipas përllogaritjeve të reja, do të nisë në shtator 2024 dhe do të eliminojë pabarazinë duke garantuar të njëjtin pension për të gjithë qytetarët që punojnë në të njëjtën punë dhe për të njëjtin numër vitesh.

Projektligji duhej të miratohej në gjysmën e parë të vitit, por u shty disa herë. Data e planifikuar e hyrjes në fuqi përkon me zgjedhjet lokale, parlamentare, presidenciale dhe ato europiane. Shpenzimet e qeverisë për pensionet do të rriten vitin e ardhshëm në rreth 31.45 miliardë dollarë.

Reforma e sistemit të pensioneve është një kusht që Rumania të tërheqë paratë nga fondet e BE-së për rikuperimin nga kriza e koronavirusit, në një kohë që  Bukureshti është angazhuar për eliminimin e pabarazisë dhe për të shmangur politizimin e rritjes së pensioneve përpara zgjedhjeve.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.