Sfidat e qëndrueshmërisë për kompanitë/Konferenca ‘Business2030’ bashkon kompanitë suedeze dhe ato shqiptare

Prezantimi i praktikave të qëndrueshme tradicionale dhe inovative për kompanitë shqiptare, me qëllim përballimin e sfidave të zhvillimit të qëndrueshëm”. Ky ishte qëllimi i konferencës Business2030, i organizuar nga Ambasada e Suedisë në Shqipëri dhe Kombet e Bashkuara, që ofroi mjetet dhe njohuritë e nevojshme për përballjen me çështjet e qëndrueshmërisë, digjitalizimin, standardet më të larta të sigurisë dhe cilësisë, si dhe integrimin në Bashkimin Evropian.

  “Të gjithë duhet të angazhohemi për të ndërtuar një të ardhme të qëndrueshme! Me më pak se një dekadë të mbetur deri në përmbushjen e Objektivave të Zhvillimit të Qëndrueshëm, puna e bizneseve për t’u bërë të qëndrueshme është më e rëndësishme se kurrë më parë. Shqipëria dhe bizneset shqiptare janë pjesë e Evropës dhe e zinxhirit të vlerave evropiane, dhe ne duam të forcojmë zhvillimin e qëndrueshëm. Ne duam të mbështesim kompanitë shqiptare në procesin e anëtarësimit në BE duke arritur standardet e saj dhe duke kontribuar në një kalim të qetë dhe të drejtë drejt një ekonomie neutrale ndaj klimës, e cila përmirëson cilësinë e jetës, krijon kushte më të mira për zhvillim demokratik dhe gjithëpërfshirës dhe që nuk lë askënd pas”  deklaroi Elsa Hastad,  Ambasadore e Suedisë në Shqipëri

Koordinatorja e Përhershme e Kombeve të Bashkuara në Shqipëri e vuri theksin te nevoja në rritje për “biznese të gjelbra”.

“Bota tani e kupton se emetimet e karbonit nuk po ngadalësohen, dhe ne mund të mos jemi në gjendje të kufizojmë rritjen e temperaturës në 1.5 gradë celsius. Ndërsa rritja e temperaturës së tokës vijon, ne do të shohim pasojat në rendimentet e të korrave, humbjet e përhapura të specieve dhe rreth 40 për qind e popullsisë globale do të ekspozohet ndaj temperaturave ekstreme. Nevoja për veprim po rritet dhe fushat që kërkojnë ndryshim zgjerohen. Jo vetëm nga marrëveshjet globale – si Parisi – apo rregulloret, por edhe nga investitorët, fondet e investimeve që duan të ndihmojnë në ndërtimin e “bizneseve të gjelbra” në vetë sektorin privat dhe nga shoqëria civile dhe veçanërisht të rinjtë, ata që do të preken më shumë” deklaroi Fiona Mccluney,  Koordinatore e Përhershme e Kombeve të Bashkuara në Shqipëri.

Ndërkaq, zëvendëskryeministrja, Belinda Balluku bëri me dije se aktualisht po punohet për hartimin e Strategjisë së Zhvillimit Ekonomik e Social të vendit.

Përveç sesioneve të parashikuar, konferenca ofroi mundësi bashkëpunimi dhe njohuri nga bizneset suedeze, që janë liderë në praktikat e qëndrueshmërisë.

Ola Mitre/SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.