Shenjat e para të uljes së inflacionit në Gjermani – Muaji tetor regjistroi rënie të çmimit të prodhimeve

Sipas raportimeve të Deutsche Welle, në Gjermani në muajin tetor është shënuar rënie e çmimeve të prodhimeve për herë të parë në dy vjet e gjysmë. Zyra Federale e Statistikave konfirmoi se se çmimet e prodhimit kanë rënë në tetor mesatarisht me 4.2 për qind krahasuar me muajin e kaluar. “Kjo ishte rënia e parë e çmimeve krahasuar me muajin e mëparshëm që nga maji 2020.” Në shtator kishte një rritje të prej 2.3%.

Ekonomistët e anketuar nga agjencia e lajmeve Reuters prisnin një rritje të inflacionit prej 0.9%, krahasuar me muajin e kaluar. Krahasuar me të njëjtin muaj të një viti më parë, norma e inflacionit është 34.5% më e lartë, por edhe këtu është shënuar rënie, pasi inflacioni në gusht dhe shtator ka qenë më i larti prej fillimit të matjeve në vitin 1949, me 45.8% krahasuar me një vit më parë.

Këto të dhëna lënë të kuptohet se inflacioni i lartë po arrin gradualisht kulmin e tij. Çmimet e prodhimit reflektohen edhe në çmimet e shitjes së prodhuesit. Përveç çmimeve të shitjes me shumicë dhe çmimeve për mallrat e importuara në Gjermani, ato tregojnë edhe bazën për çmimet e përgjithshme. Të gjitha ato ndikojnë në çmimet e konsumit, mbi të cilat Banka Qendrore uvropiane e mbështet politikën e saj monetare. Kur prodhuesit rrisin ose ulin çmimet e tyre, kjo zakonisht prek edhe familjet, të paktën pjesërisht. Në statistika, çmimet krijohen që nga dalja e mallit prej portave të fabrikës e deri tek shitja. Në tetor, çmimet e konsumit në Gjermani kanë qenë 10.4% më të larta se një vit më parë, që është norma më e lartë e inflacionit që nga viti 1951.

Arsyeja kryesore për rritjen kaq të lartë të inflacionit në nivel prodhues është energjia, e cila ka kushtuar dukshëm më shumë që nga fillimi i pushtimit rus në Ukrainë më 24 shkurt të këtij viti. Çmimet e prodhimit në këtë sektor kanë qenë 85.6% më të larta se në tetor 2021.

Ushqimi ka qenë 25.1% më i shtrenjtë se në të njëjtin muaj të vitit të kaluar. Çmimet në veçanti janë rritur për gjalpin +66.3%, mishin e derrit +47%, djathin +38.3 % dhe qumështin +36.1%. Ndërsa kafeja ishte 29.1% më e shtrenjtë se në tetor 2021.

Por për konsumatorët e vegjël, pra edhe për familjet private, çmimet e energjisë elektrike dhe gazit vazhduan të rriten edhe në tetor. Sipas pjesës më të madhe të tyre problemi i inflacionit është larg zgjidhjes përfundimtare.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.