Shteti ku qepa kushton 3 herë më shtrenjtë se pula! – Shkak, moti i keq dhe kontrabanda

Qepët e thata kushtojnë pothuajse tre herë më shumë se pula në Filipine. Qepët e kuqe dhe të bardha shiteshin deri në 600 pesos, ose 10.5 euro për kilogram të hënën, krahasuar me 220 pesos (3.7 euro) për kilogram për pulën, sipas Departamentit të Bujqësisë të vendit.

Zyrtarët thonë se vendi tani ka “çmimet më të shtrenjta të qepëve në botë”, ndërsa filipinasit kanë hyrë në mediat sociale për të protestuar ndaj çmimeve të tepruara. Qepa është një përbërës kryesor në kuzhinën filipinase dhe konsumohet në sasi të mëdha.

Rritja e çmimeve vjen pasi një valë tajfunesh të mëdhenj goditi vendin vitin e kaluar, duke dëmtuar prodhimin me vlerë dhjetëra miliarda pesos. Vendi i Azisë Juglindore është përballur me një rritje të mprehtë të inflacionit në muajt e fundit, me çmimet e konsumit që u rritën me 8.1 për qind në dhjetor, niveli më i lartë i 14 viteve, sipas Autoritetit të Statistikave të Filipineve.

Çmimet rekord kanë nxitur një sërë hetimesh zyrtare, duke përfshirë Parlamentin dhe Avokatin e Popullit, i cili tha se po shqyrton manipulimin e çmimeve. Madje qepa është bërë një mall aq i kërkuar sa futet kontrabandë në vend.

Zyrtarët doganorë sekuestruan qepë të bardha në vlerë 300,000 euro të fshehura në një ngarkesë me konfeksione më 23 dhjetor. Ndërkohë, dy ditë më parë dogana ka sekuestruar edhe qepë të kuqe nga Kina me vlerë 350 mijë euro, që janë gjetur të fshehura në kuti ëmbëlsirash.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.