Shtyhet koncesioni i markimit të karburanteve – Qytetarët do pagujnë 2 lekë/litër deri në mars të vitit 2024

Qeveria ka shtyrë me 1 vit koncesionin e markimit të karburanteve, çka do të thotë se kosto prej 2 lekë/litër do të vijojë të paguhet nga qytetarët deri në mars 2024. Shtojca është publikuar në Fletoren Zyrtare, duke rritur në 11 vjet kohëzgjatjen e kontratës, nga 10 vjet që ishte më herët. Ndërkohë që, vendimi është marrë pas 4 muajsh nga përfundimi i koncesionit, që ishte marsi 2023.

Publikisht, qeveria nuk ka dhënë asnjë argument mbi aryset e kësaj shtyrjeje, teksa vetë kontrata përcakton se zgjatja e afatit mund të bëhet vetëm në raste të Forcës Madhore dhe jo më shumë se 120 ditë.

Kompanitë koncesionare Global Fluids International SA dhe Petroleum Consulting Partners AG e ofrojnë shërbimin e markimit dhe monitorimit  me një çmim prej 614 Lekë për 1000 Litra të markuara (pa TVSH). Ndërkohë që kjo tarifë përgjatë 10 viteve iu ka garantuar fitime para tatimit, në vlerën e rreth 724 mln lekëve.

Të dhënat janë deklaruar nga vetë koncesionari pranë Qendrës Kombëtare të Biznesit, ku viti 2022 duket se ka qenë më fitimprurësi, me 172.6 mln lekë, teksa vlera e investimit në kontartën koncesionare parashikohej të ishte 4.17 mln USD.

Ndërkaq, importuesit e naftës pohojnë se në rast se nuk paguajnë tarifën e markimit nuk iu mundësohet zhdoganimi i karburanteve. Vlera prej 2 lekë/litër për markimin është një nga taksat dhe tarifat e përfshira në çmimin e karburantit, që paguhet drejtpërdrejt nga qytetarët.

Ola Mitre /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.