Tkurret ekonomia gjermane – Rezultati më i keq nga sa pritej në 3-mujorin e katërt 2022 rrit frikën e recesionit

Ekonomia gjermane u tkurr më fuqishëm se sa pritej në tre muajt e fundit të 2022-shit, pasi inflacioni dhe kriza e energjisë ndikuan në konsumin e familjeve dhe investimet kapitale. Ekonomia gjermane u tkurr me 0.4% në tremujorin e katërt të 2022 – shit krahasuar me tre muajt e mëparshëm, sipas zyrës vendore të statistikave.

Të dhënat paraprake nga zyra vunë në dukje një tkurrje tremujore prej 0.2% të rregulluar për efektet e çmimeve dhe kalendarit. Në tremujorin e tretë të vitit 2022, produkti i brendshëm bruto pati një rritje të lehtë prej 0.5% krahasuar me tre muajt e mëparshëm. Rënia e dytë radhazi në komponentin aktual të vlerësimit, një rënie e prodhimit, besimi i dobët i konsumatorëve dhe gatishmëria për të shpenzuar pranë niveleve më të ulëta historike, tregojnë për një tkurrje të ekonomisë gjermane edhe një herë më shumë në tremujorin e parë.

Rezultati përfundimtar më i keq se sa pritej për tremujorin e katërt rrit frikën për një recesion dimëror. Një recesion zakonisht përkufizohet si dy tremujorë të njëpasnjëshëm të tkurrjes.

Ekonomistët shprehen se shifrat aktuale tregojnë se rritja e mprehtë e çmimeve të energjisë ka ngadalësuar dukshëm ekonominë pavarësisht masave të gjera të ndihmës së qeverisë. Me shtrëngimin global të politikës monetare, vështirë se mund të pritet një rimëkëmbje e dukshme ekonomike.

Pas përfundimit të masave lehtësuese si ulja e cmimit karburantit dhe bileta e transportit prej 9 eurosh, konsumatorët shpenzuan më pak në tremujorin e katërt sesa në tremujorin e tretë, sipas zyrës së statistikave. Shpenzimet e familjeve u ulën me 1%, ndërsa shpenzimet e qeverisë u rritën me 0.6% krahasuar me tremujorin e mëparshëm.

Investimet kanë ndikuar edhe në ecurinë ekonomike. Për shembull investimet në ndërtim ranë me 2.9% në tremujorin e katërt, ndërkohë që investimet në makineri dhe pajisje ranë me 3.6%, të përshtatura për inflacionin, efektet sezonale dhe ato kalendarike.

Në tremujorin e katërt, eksportet e mallrave dhe shërbimeve ranë me 1% krahasuar me tremujorin e tretë. Kjo për shkak të situatës së vështirë ndërkombëtare, e karakterizuar nga ndërprerje të vazhdueshme e zinxhirit të furnizimit dhe çmimeve të larta të energjisë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.