Tregu monetar e nis javën në qëndrueshmëri – Dollari po qëndron në nivelin më të ulët në 1 muaj

Tregu monetar e ka nisur këtë javë në qëndrueshmëri, me dollarin amerikan që po qëndron në nivelin më të ulët më 5 javët e fundit. Investitorët po rivlerësojnë pozicionet e tyre, pas një jave shumë të ngjeshur me vendimet e bankave qëndrore. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 102.3, niveli më i ulët në 1 muaj. Ndërkohë, volumi i shkëmbimeve tregtare pritet të jetë i ulët, pasi Wall Street do të qëndrojë pushim në sesionin e sotëm, me rastin e një feste kombëtare.

Të enjten e kaluar, Banka Qendrore Europiane rriti normën bazë të interesit edhe me 25 pikë bazë duke e çuar në 3.5%, niveli më i lartë në 22 vite. Gjithashtu, presidentja e BQE, Christine Lagarde, njoftoi se inflacioni do të qëndrojë i lartë për një kohë të gjatë dhe do të shkojë pranë objektivit prej 2% në vitin  2025.

Në anën tjetër, Rezerva Federale nuk e ndryshoi politikën monetare, por paralajmëroi edhe dy rritje të tjera më vonë gjatë këtij viti. Investitorët vlerësojnë 72% mundësi që rritja e normave të interesit mund të ndodhë në takimin e korrikut. Në tregun e kriptomonedhave, bitcoin po tregtohet në rreth 26,400 dollarë, ndërsa ethreum po tregtohet në rreth 1720 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.