Ujësjellësit përmirësojnë performancën – Nga kostot e operimit, te eficienca e stafit. Uji pa të ardhura, në të njëjtat nivele

Shoqëritë e ujëjsjellësve kanë përmirësuar lehtë treguesit e performancës, që lidhen me numrin e stafit, mbulimin e kostove të operimit dhe mirëmbajtjes apo eficiencën e energjisë, ndërsa treguesi i ujit pa të ardhura mbeti thuajse në të njëjtat nivele.

Sipas të dhënave zyrtare nga Enti Rregullator i Ujit, gjatë vitit 2023 mbulimi i kostove të operimit dhe mirëmbajtjes arriti në 104%, nga 90.3% që ky tregues ishte në vitin 2022.

Rritja e këtij treguesi lidhet direkt me qëndrueshmërinë financiare të shoqërive ujësjellës – kanalizime, që vitin që shkoi iu nënshtruan reformës, duke sjellë bashkimin e tyre dhe krijimin e shoqërive më të mëdha. Po ashtu, numri i lidhjeve në raport me stafin u regjistrua në 4.6 për 1000 lidhje, nga 4.73 për 1000 lidhje që ishte në vitin 2022.

Ky përmirsim mund të vijë nga rritja e numrit të lidhjeve të reja ose si pasojë e reduktimit të numrit të punonjësve. Në fakt, ERRU ka kërkuar vazhdimisht rritjen e eficiencës së stafit, duke qenë se është një tregues shumë i rëndësishëm pasi lidhet direkt me kostot e punës, që së bashku me energjinë elektrike zënë peshën kryesore ndaj totalit të kostove të operimit të shoqërisë. Sa i takon eficiencës së energjisë ky tregues rezultoi në 0.5 kWh/m³, nga 0,65 kWh/m³ që ishte ky tregues një vit më parë.

Kostot e energjisë janë një shqetësim për shoqëritë e ujësjellës – kanalizme, që lindin si pasojë e humbjeve fizike, por edhe cilësisë së pompave të përdorura prej tyre. Ndërkaq, sa i takon ujit pa të ardhura, shifrat vijojnë të mbeten në nivele shumë të larta. Në vitin 2023 ky tregues u regjistrua në 64%, nga 63.7% që ishte gjatë vitit 2022.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.