Ukraina ngrin asetet e tre manjatëve rusë me vlerë 464 milionë dollarë!

Një gjykatë ukrainase ka ngrirë asetet ukrainase të tre biznesmenëve rusë për mbështetjen e tyre të dyshuar për luftën e Rusisë në Ukrainë, thanë të premten prokurorët dhe shërbimi i sigurisë.

Shërbimi i Sigurisë së Ukrainës (SBU) tha se asetet në pronësi të Mikhail Fridman, Pyotr Aven dhe Andrey Kosogov ishin ngrirë. Ata konsideroheshin pjesë e rrethit të ngushtë të Presidentit Vladimir Putin dhe kontribuuan në “financimin në shkallë të gjerë të agresionit të armatosur të Federatës Ruse”, thuhet në deklaratë.

“Me kërkesë të prokurorëve… asetet e 20 kompanive ukrainase në mbi 17 miliardë hryvnia (464.48 milionë dollarë) u ngrinë,” tha Zyra e Prokurorit të Përgjithshëm në aplikacionin e mesazheve Telegram.

Ai tha se asetet e ngrira përfshinin letra me vlerë dhe të drejtat e korporatave të operatorëve të telefonisë celulare, një prodhuesi të ujit mineral, kompani financiare dhe sigurimesh.

“Pronarët përfitues të kompanive janë tre oligarkë rusë, të cilët zotërojnë një nga konsorciumet më të mëdha financiare dhe investuese ruse,” tha ai.

Që nga fillimi i pushtimit ushtarak të Rusisë në shkurt të vitit 202, Ukraina ka konfiskuar dhe shtetëzuar vazhdimisht pronat që u përkasin biznesmenëve rusë të përfshirë në financimin e agresionit.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.