Ulje emetimeve të dioksidit të karbonit për kamionët – BE zotohet të zbatojë objektivin deri në 90% brenda vitit 2040

Vendet e Bashkimit Europian mbështetën objektiva më të ashpra për sa i përket emetimeve të dioksidit të karbonit për automjetet e mallrave të rënda, duke kërkuar që kamionët e rinj të ulin emetimet e tyre me 90% deri në vitin 2040, por ata shtynë sërish në kohë objektivin e planifikuar për të pajisur qytetet vetëm me autobusë elektrikë.

Ministrat e klimës së vendeve anëtare të BE-së ranë dakord të mbështesin një ligj të propozuar për këtë çështje, i cili gjithashtu do të kërkonte që kamionët e rinj të shitur në BE të kenë 45% më pak emetime dioksidi të karbonit deri në vitin 2030 dhe 65% deri në vitin 2035, krahasuar me nivelet e 2019-ës.

Ata shtynë gjithashtu deri në vitin 2035 një objektiv të propozuar që të gjithë autobusët e rinj të qytetit të kenë zero emetime dioksidi karboni, pasi vendet përfshirë Francën dhe Estoninë thanë se një afat kohor i 2030- ës i propozuar nga Komisioni Europian ishte jorealist.

Ligji i propozuar, për të cilin vendet e BE-së do të negociojnë me Parlamentin Europian, synon të nxisë investime për të reduktuar CO2 e sektorit të automjeteve të rënda dhe për të zgjeruar prodhimin e automjeteve elektrike, gjë që disa prodhues tashmë janë zotuar ta bëjnë.

‘Daimler Truck’, për shembull, është zotuar se kamionët e rinj të prodhuar do të jenë neutral ndaj dioksidit të karbonit nga viti 2039 në Europë, SHBA dhe Japoni. Shumica e kamionëve në Europë aktualisht punojnë me naftë.

Italia kërkoi më shumë hapësirë për automjetet me motorë me djegie që funksionojnë me lëndë djegëse me pak karbon, gjë që mund të kishte reduktuar potencialisht sasinë e kamionëve elektrikë që do të duhej të shesin prodhuesit për të përmbushur objektivin.

Vendet duke përfshirë Danimarkën, Holandën dhe Portugalinë e kundërshtuan këtë lëvizje, e cila sipas tyre do të dobësonte objektivat e reduktimit të dioksidit të karbonit. Vendet ranë dakord të marrin në konsideratë idenë vetëm kur ligji të rishikohet në vitin 2028.

BE-ja ka miratuar tashmë një ligj që përcakton një afat deri në 2035 që automjetet e reja të mos emetojnë dioksid karboni. Ligjvënësit e BE ende nuk kanë rënë dakord për pozicionin e tyre negociues. Disa kanë thënë se diçka më pak se një shkurtim 100% deri në vitin 2040 do të thotë se kamionët me emetim dioksidi karboni do të jenë ende në rrugë në vitin 2050, duke kërcënuar qëllimin afatgjatë të BE-së për mbrojtjen e klimës.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.