FMN “skanon” ekonominë e Kosovës – “Rritje ekonomike deri 4% këtë vit. Inflacioni do të vijojë të zbutet”

Një mision i Fondit Monetar Ndërkombëtar (FMN), vizitoi së fundmi Prishtinën ku zhvilloi bisedime me autoritetet për për rishikimet e para të Marrëveshjes Stand-By dhe asaj të Lehtësimit dhe Rezistencës së Qendrueshme.

Në përfundim të këtyre takimeve, kreu i misionit, Gabriel Di Bella, deklaroi se, “ekonomia e Kosovës në vitin 2023 parashikohet të zgjerohet me 3,5-4%, nxitur nga investimet më të forta dhe kërkesa e jashtme, veçanërisht për shërbime. Me ngadalësimin e çmimeve të ushqimeve dhe energjisë, inflacioni mesatar pritet të bjerë këtë vit në 4-5%, deficiti i llogarisë korente të jashtme parashikohet të ngushtohet”.

Kreu i misionit të FMN, Gabriel Di Bella: “FMN pret që rritja të vazhdojë në vitin 2024 dhe që inflacioni të vazhdojë të zbutet. Megjithatë, paqëndrueshmëria globale dhe tensionet gjeopolitike e mbajnë pasigurinë të ngritur dhe paraqesin rreziqe për ekonominë dhe inflacionin. Tensionet e vazhdueshme në veri të Kosovës kanë shtyrë disa partnerë ndërkombëtarë të zbatojnë masa të përkohshme dhe të kthyeshme që synojnë depërshkallëzimin. FMN gjykon se këto masa nuk kanë gjasa të ndikojnë në perspektivën afatshkurtër të vendit, por ato mund të ndikojnë në performancën nëse qëndrojnë për një kohë të gjatë”.

FMN mbështet edhe politikat e qeverisë në sektorin energjetik ku vërehet se është bërë përparim i rëndësishëm për të çuar përpara axhendën e politikës klimatike.

Di Bella: “Nisja e ankandit të parë pilot të prodhimit të energjisë diellore prej 100 MW dhe dërgimi në Parlament i një ligji për burimet e rinovueshme të energjisë, hap rrugën për rritjen e prodhimit të energjisë së pastër nëpërmjet një ankandi konkurrues. Duke përfituar nga mësimet nga ankandi i parë, qeveria ka vendosur të nisë deri në mesin e vitit 2024 një tender të hapur, konkurrues dhe transparent për të tërhequr investime private për të ndërtuar dhe operuar 150 MW kapacitet të prodhimit të energjisë elektrike me bazë ere. Kjo do të ishte e para e këtij lloji në Kosovë, një arritje e rëndësishme”.

Ndërkohë, në Kosovë ka filluar zbatimi i programeve për rritjen e efikasitetit të energjisë në ndërtesat e banimit dhe janë ndërmarrë hapa për të forcuar bashkëpunimin rajonal, konkurrencën në treg dhe funksionimin duke zbatuar veprime të favorshme për fillimin e tregut të energjisë elektrike me Shqipërinë nëpërmjet Bursës Shqiptare të Energjisë Elektrike, ALPEX. Për të mbrojtur konsumatorët vulnerabël të energjisë, autoritetet kanë përgatitur një plan gjithëpërfshirës, ​​me financim në buxhetin e vitit 2024.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.