Vala e të nxehtit prek të gjithë Europën – Sistemet energjetike vihen nën presion

Aktualisht e gjithë Europa është prekur nga vala e të nxehtit ekstrem. Një situatë që ka krijuar jo pak presion mbi sistemet energjetike. Në të kundërt, Britania e Madhe dhe vendet nordike do të përjetojnë temperatura më të ftohta gjatë 10 ditëve të ardhshme

Vala e të nxehtit po prek tashmë të gjithë Europën nga Gjermania në Ballkan, duke ushtruar presion mbi sistemet energjetike dhe të transportit të rajonit pasi lumenj si Rhine dhe Rhone janë prekur.

Shërbimi kombëtar i motit i Gjermanisë paralajmëroi këtë javë për një “fenomen të nxehtësisë ekstreme në Rinin e Epërm”. Një paralajmërim i ngjashëm është lëshuar edhe nga shërbimi meteorologjik italian, ku temperatura në Sardenjë ka kaluar 40 gradë Celsius.

Ndryshimet klimatike po rrisin frekuencën e motit ekstrem në të gjithë hemisferën veriore këtë verë, duke sjellë nxehtësi të madhe nga Kina në Teksas, ndërsa përmbytjet goditën Nju Jorkun dhe Delhi. Rritja e temperaturave tregon se Europa ka thyer rekordet e vendosura vitin e kaluar.

Nxehtësia e verës dhe ujërat e pakta në lumin Rhine, i cili është kritik për transportin e mallrave të energjisë në Europë, mbeten në fokus këtë muaj. Niveli në Kaub – një pikë kyçe në lumin në perëndim të Frankfurtit – pritej të binte nën 1 metër një ditë më parë, sipas Administratës Federale të Ujit të Gjermanisë. Vitin e kaluar në gusht, niveli i ujit në Kaub ra nën 40 cm, nivel të cilin shumë kompani e konsideruan jo në gjendje për të transportuar mallra.

Kostoja e transportit të naftës nga qendra e tregtimit të naftës në Roterdam në një pikë kyçe në Rhein e Epërm pa rritjen e saj më të madhe që nga shkurti, pasi nivelet e ulëta të ujit kufizojnë volumin që mund të bartin maune.

Mbinxehja e një tjetër rruge ujore kryesore, Rhone, ka të ngjarë të detyrojë Electricite de France – EDF të kufizojë prodhimin e energjisë bërthamore në disa prej reaktorëve të saj bërthamorë nga sot. Sipas rregulloreve franceze, EDF duhet të zvogëlojë ose të ndalojë prodhimin kur temperaturat e lumenjve tejkalojnë disa nivele për të siguruar që uji i përdorur për të ftohur reaktorët bërthamorë të mos dëmtojë mjedisin kur rihyn në rrugët ujore.

Maxar Technologies pret që vala e të nxehtit në Gjermani të ulet deri në javën e ardhshme, pasi temperaturat arritën në 35.5 gradë Celsius. Megjithatë, temperaturat mbi normale pritet të vazhdojnë në pjesën më të madhe të Europës Jugore, me Ballkanin që do të shohë temperatura afër 40 gradë.

Në të kundërt, Britania e Madhe dhe vendet nordike do të përjetojnë temperatura më të ftohta gjatë 10 ditëve të ardhshme. Londra do të jetë 4.2 gradë nën normale të dielën dhe të hënën. Britania e Madhe regjistroi qershorin më të nxehtë në histori.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.