Vizat e arta në Europë shënojnë “kulmin” – Injorohen apelet e politikanëve për ndërprerjen e procedurave

Programet për investim për të përfituar nënshtetësi europiane janë aktive dhe vijojnë, pavarësisht thirrjeve nga i gjithë spektri politik për t’i dhënë fund kësaj procedure. Në Greqi dhe Portugali, numri i vizave të dhëna muajt e fundit ka qenë në rritje dhe kërkesa në Itali dhe Spanjë ka arritur nivele rekord.

Të ashtuquajturat viza të arta u lejojnë të huajve të pasur të fitojnë rezidencën e BE-së – dhe si rrjedhim, një rrugë drejt shtetësisë – duke investuar në pasuri të paluajtshme lokale ose asete financiare. Ka pak kushte të bashkangjitura dhe disa programe që kërkojnë të shpenzoni jo më shumë se një javë në vend në vit.

Më shumë se 132 mijë persona morën nënshtetësinë përmes këtyre programeve midis 2011 – ës dhe 2019 – ës. Një situatë që ka shtuar akuzat nga politika pasi ato janë shoqëruar me rritjen e çmimeve të pronave. Anëtarët e Parlamentit Europian dhe Komisionit Europian u kanë kërkuar vendeve të BE-së që t’i mbyllin ato, me Irlandën dhe Britaninë e Madhe që e kanë bërë tashmë këtë. Lufta e Rusisë ndaj Ukrainës ka vënë përballë një analize të kujdesshme me vizat e arta. Kjo sepse sipas deputetit belg Saskia Bricmont, kjo mbetet një mënyrë e mundshme për “oligarkët, kriminelët dhe politikanët e korruptuar” që të “blejnë rrugën e tyre në Europë dhe të pastrojnë paratë, imazhin dhe identitetin e tyre.”

Thirrjet për të hequr qafe vizat e arta po fitojnë vëmendje. Kryeministri i Portugalisë njoftoi fundin e programit të vendit të tij në një konferencë shtypi në shkurt, duke deklaruar se “asgjë nuk e justifikon këtë regjim special”. Greqia dyfishoi pragun e saj të investimeve nga 250 mijë euro në 500 mijë euro në pjesë të caktuara të vendit. Mali i Zi u zotua t’i japë fund programit të tij dhe Spanja po peshon nëse do të rrisë investimin e saj minimal nga 500 mijë euro në 1 milion euro – ose do ta heqë plotësisht atë.

Të prezantuara pas krizës financiare të vitit 2008 për të tërhequr kapitalin e huaj, vizat e arta u bënë veçanërisht të njohura gjatë pandemisë pasi amerikanët që kërkonin një Plan B u dyndën në Europë.

Ndërsa politikanët në të gjithë Europën kanë folur për një lojë të madhe, legjislacioni që ata kanë miratuar për të kufizuar vizat e arta nuk ka qenë aq i ashpër. Portugalia hoqi qafe opsionin e saj të rezidencës përmes investimit në pasuri të paluajtshme në korrik, por la të paprekur mundësinë për të huajt për të marrë rezidencën nëse investojnë të paktën 500 mijë euro në kompani vendase ose fonde që nuk lidhen me pasuri të paluajtshme. Holanda është ende duke pranuar aplikime për viza të arta, pavarësisht se ka njoftuar planet për të përfunduar programin e saj. Kështu ndodh edhe në Malin i Zi.

Më shumë njerëz po përfitojnë nënshtetësi me këtë proces: numri i vizave të arta të dhëna në Portugali vetëm në maj arriti në 180, sipas statistikave të qeverisë. Në Greqi, ky numër arriti në 412. 87% më shumë se një vit më parë.

Spanja dha 2.462 viza të arta në total vitin e kaluar, 60% më shumë nga viti 2021. Italia gjithashtu dha 79 viza të arta vitin e kaluar, kryesisht për rusët, amerikanët dhe britanikët: gati dyfishi i një viti më parë dhe më e larta që kur vendi filloi programin në 2018-ën.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.