Zjarret në pyje: Mesdheu në pritje të uljes së temperaturave!

Mesdheu është ende i kërcënuar nga zjarret në pyje. Zjarret e shkaktuara nga moti ekstrem kanë marrë jetë njerëzish në Algjeri. Numri i të vdekurve nga zjarret është rritur në 34, ka bërë të ditur Ministria e Brendshme, në mbrëmjen e së hënës, 24 korrik dhe midis të vdekurve janë edhe dhjetë ushtarë. Ushtarët janë rrethuar nga flakët gjatë një operacioni evakuimi në qytetin Beni Ksila së bashku me banorët e një fshati fqinj, tha Ministria e Mbrojtjes. Erërat e forta i kishin fryrë zjarreve të hënën në mbrëmje. Presidenti algjerian, Abdelmajid Tebboune shprehu ngushëllimet e tij për familjet e të ndjerëve.

Pavarësisht përdorimit masiv të avionëve zjarrfikës, dhe helikopterëve zjarri vazhdon të jetë jashtë kontrollit. Zjarret më të rënda shpërthyen të hënën pranë Rodosit në ishullin Euboea. Në ishullin e pushimeve të Korfuzit në veriperëndim të vendit, zjarri u arrit të vihej nën kontroll. Greqia tani po pret me padurim të enjten. Për herë të parë prej pothuajse dy javësh, temperaturat pritet të bien nga 40 në 45 gradë në vlera normale prej rreth 35 gradë.

Zjarrfikësit luftuan flakët në dhjetëra rajone të vendit të hënën. Rreziku i zjarrit mbeti jashtëzakonisht i lartë. Kjo vlente për rajonin e Athinës, gadishullin e Peloponezit dhe shumë ishuj të detit Egje.  Turistët, megjithatë, nuk janë në rrezik, sepse tashmë janë të sigurt dhe që të shtunën janë sjellë në pjesën veriore të ishullit. Por sipas përllogaritjeve, të hënën ishin ende rreth 9500 vetë të strehuar në salla dhe shkolla ose nëpër shtëpi private.

Ministria e Punëve të Jashtme gjermane po mbështet pushuesit gjermanë në Rodos me staf në terren dhe është në kontakt me autoritetet greke dhe operatorët gjermanë të udhëtimeve, tha një zëdhënëse e Ministrisë të hënën në Berlin. Të hënën pasdite u mblodh Shtabi i Krizës në këtë ministri. Një zëdhënëse për Ministrinë e Brendshme të Gjermanisë tha se edhe Policia Federale (Bundespolizei) po ndihmon turistët në kthimin e tyre. Zjarrfikësit gjermanë që kishin qenë në vendngjarje ishin kthyer që atëherë. “Ne jemi gati për ndihmë të mëtejshme”, tha zëdhënësja.

Disa operatorë të mëdhenj turistikë gjermanë ndërkohë i anuluan udhëtimet për Rodos. Der Touristik i ka anuluar të gjitha udhëtimet në jug të Rodosit deri të shtunën (më 29 korrik). E njëjta gjë vlen edhe për qëndrimet në hotelet që ndodhen në ishullin grek të Korfuzit në zonën që ende është në rrezik. Operatori turistik FTI anuloi të gjitha udhëtimet në Rodos deri në dhe duke përfshirë të mërkurën (26 korrik).

Edhe në vende të tjera në rajonin e Mesdheut gjithashtu vazhdon thatësira dhe rreziku i djegies së pyjeve. Në Turqi, temperaturat në detin Egje dhe detin Mesdhe janë deri në tetë gradë mbi vlerën e zakonshme për këtë periudhë të vitit, sipas shërbimit të motit. Të mërkurën atje priten temperatura deri në 42 gradë. Ndërkohë, një zjarr i ri pyjor shpërtheu në krahinën jugore turke Mugla, pak pasi shërbimet e emergjencës kishin vënë nën kontroll një tjetër zjarr.

Në Spanjë dhe Portugali, rreziku i zjarreve në pyje është gjithashtu jashtëzakonisht i lartë për shkak të thatësirës së gjatë në pjesë të mëdha të të dy vendeve. Nxehtësia ekstreme gjithashtu bën që bimësia të thahet edhe më shumë, gjë që çon në zjarre që ndonjëherë përhapen pothuajse në mënyrë shpërthyese. Zjarre ka pasur në ditët e fundit edhe në Kalabri. Në Cosenza zjarrfikëset shuan zjarre deri të hënën.

Ndërkohë Kryqi i Kuq ka paralajmëruar se vala e të nxehtit dhe zjarret pyjore në hemisferën veriore përbëjnë rrezik për shpërthimin e municioneve të vjetra nga koha e luftës. Erik Tollefsen, ekspert i armëve në Komitetin Ndërkombëtar të Kryqit të Kuq (ICRC) në Gjenevë, tha për Agjencinë gjermane të lajmeve, dpa, se e njëjta gjë vlen edhe për depot e municioneve në poligonet ushtarake të qitjes dhe depot e braktisura të municioneve, të cilat shpesh ngrihen në zona të largëta.

E . S / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.