BE gjobit Apple me 500 milionë euro – Akuzohet për shkelje të ligjit të konkurrencës

Komisioni Europian do të gjobisë Apple me rreth 500 milionë euro për shkeljet e supozuara të ligjit të konkurrencës. Brukseli fillimisht nisi një hetim mbi pretendimet se Apple pengoi shërbimet muzikore të palëve të treta në pajisjet e tij dhe favorizoi shërbimin e vet Apple Music, pasi Spotify paraqiti një ankesë zyrtare te rregullatorët në 2019 -ën.

Në shumicën e rajoneve, rregullat e App Store të Apple i ndalojnë kompanitë si Spotify që të faturojnë përdoruesit për abonimet direkt brenda aplikacionit, duke i bërë ata të përdorin shërbimin e faturimit të App Store të Apple, i cili merr një ulje deri në 30%.

Brukseli akuzoi zyrtarisht Apple në një hetim kundër konkurrencës në vitin 2021, por e ngushtoi objektivin e hetimit vitin e kaluar, duke hequr dorë nga akuza për shtyrjen e zhvilluesve për të përdorur sistemin e vet të pagesave brenda aplikacionit.

Versioni i fundit i hetimit u fokusua tek fakti nëse Apple kishte kufizuar aplikacionet që të informonin përdoruesit për alternativa më të lira të abonimit jashtë App Store-it të saj vendas duke shkelur në këtë mënyrë ligjet e konkurencës të BE-së.

Përfundimet e hetimit do të çojnë në akuzën për abuzim me pozicionin e saj të fuqishëm dhe ndalimin e kushteve të padrejta të tregtimit në lidhje me politikat e saj të abonimit të shërbimit muzikor.

Nëse vendoset, gjoba do të ishte një nga gjobat më të mëdha financiare që BE ka vendosur ndaj një kompanie të madhe teknologjike. Ajo pason një seri gjobash të mëdha të kontestuara kundër Google. Ndërsa Apple është përballur me gjoba më parë – si dënimi prej 1.1 miliardë eurosh në Francë që më vonë u ul në 372 milionë euro në apel – kjo do të shënonte gjobën e parë të këtij lloji nga Brukseli.

Gjoba e raportuar është pjesë e një goditjeje më të gjerë në BE dhe vjen përpara miratimit të Aktit historik të bllokut për Tregjet Dixhitale të vendosur për në mars. Ligji i ri synon të trajtojë praktikat anti-konkurruese nga lojtarët e mëdhenj të teknologjisë, duke përfshirë kompani të tilla si Apple, Amazon dhe Google.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.