BE-ja dërgon më shumë avionë zjarrfikës në Greqi ndërsa zjarret masive vijojnë!

Avionët, të cilët përbëjnë pothuajse një të tretën e flotës ajrore të shpëtimit të BE-së, do të vijnë nga Kroacia, Republika Çeke, Gjermania dhe Suedia.

“Ne po përdorim gjithashtu sistemin tonë satelitor Copernicus për t’u ofruar imazhe satelitore autoriteteve greke në mënyrë që ata të mund të përvijojnë zonën e prekur nga zjarri,” tha një zëdhënës i Komisionit Europian.

“Përfshirja është mjaft domethënëse dhe sigurisht, ne mbetemi në dispozicion të autoriteteve greke nëse lind nevoja për ndihmë shtesë,” shtoi ai.

Greqia aktivizoi Mekanizmin Civil të BE-së në përgjigje të zjarreve dy ditë më parë dhe tashmë mori avionë, zjarrfikës dhe automjete nga Qiproja dhe Rumania dje.

Mekanizmi Civil i BE-së i lejon vendet të kërkojnë ndihmë nga kombet e tjera kur shërbimet e tyre të urgjencës janë të mbingarkuar nga ngjarje të papritura, duke përfshirë zjarret, dhe është bërë një burim gjithnjë e më i vlefshëm në vitet e fundit ndërsa incidenca e zjarreve në Europën Jugore është rritur.

Komisioni Europian njoftoi në korrik se do të blinte 12 avionë të tjerë të shumëkërkuar ‘Canadair’ për të rritur kapacitetin e tij të zjarrfikësve nga ajri. Këto do të financohen tërësisht nga BE-ja, por të stacionuara dhe në pronësi të ligjshme të Kroacisë, Francës, Greqisë, Italisë, Portugalisë dhe Spanjës, vende jugore më të ndjeshme ndaj zjarreve.

Njoftimi i mbështetjes së mëtejshme të BE-së erdhi pasi autoritetet greke gjetën trupat e 18 personave që besohet se ishin emigrantë të djegur në pyllin Dadia në Evros në Greqinë veri-lindore. Pylli është përgjatë një rruge të popullarizuar në mesin e emigrantëve që kalojnë në Bashkimin Europian nga Turqia.

Greqia tashmë është përballur me muajin e saj më të keq të zjarreve që nga viti 2008 në korrik, kur rreth 50 000 hektarë, ekuivalente me rreth 95 000 fusha futbolli, u dogjën në vetëm 12 ditë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.