“Çmimi i naftës mund të shënojë rekord të ri” – Parashikimi i BB: Deri 157 dollarë/fuçi nga përshkallëzimi i luftës Izrael-Hamas

Çmimet e larta rekord të naftës mund të jenë një realitet shumë më pranë se sa mendohet, nëse do të ketë një përshkallëzim të mëtejshëm të luftës Izrael – Hamas. Paralajmërimi u bë nga Banka Botërore.

Nëse konflikti zgjerohet përtej kufijve të Rripit të Gazës në një përsëritje të embargos arabe të naftës në vitin 1973, çmimet e naftës mund të rriten në 157 dollarë për fuçi, vuri në dukje Banka Botërore në raportin e saj të fundit të Perspektivës së Tregjeve të Mallrave.

Çmimi më i lartë i regjistruar i naftës ishte në korrik 2008, kur Brent tregtohej deri në 147.5 dollarë për fuçi, sipas të dhënave nga LSEG. Në një skenar ‘ndërprerjeje të madhe’ furnizimi global i naftës do të tkurret me 6 milionë deri në 8 milionë fuçi në ditë, sipas Bankës Botërore. Kjo do të rriste çmimet me 56% në 75% fillimisht – mes 140 dhe 157 dollarë për fuçi.

Kriza e naftës pesëdhjetë vjet më parë bëri që çmimet e naftës të katërfishoheshin pasi ministrat arabë të energjisë vendosën një embargo ndaj eksporteve të naftës ndaj SHBA-së si hakmarrje për mbështetjen e Izraelit në luftën arabo-izraelite të vitit 1973, e njohur në Izrael si Lufta e Yom Kipurit.

Nëse konflikti do të përshkallëzohej, ekonomia globale do të përballej me një goditje të dyfishtë energjetike për herë të parë në dekada. Projeksioni është një nga tre skenarët e rrezikut të Bankës Botërore që vlerëson shkallët e ndryshme të ndërprerjes së furnizimit me naftë, bazuar në episodet e kaluara historike që përfshijnë konflikte rajonale.

Në rastin e një ‘ndërprerjeje të vogël’, furnizimet globale të naftës do të kenë një reduktim prej 500 mijë fuçi në ditë në 2 milionë fuçi në ditë, një rënie që krahasohet me atë që u pa gjatë luftës civile libiane të vitit 2011.

Një skenar i ‘ndërprerjes së mesme’ do të reduktonte 3 milionë deri në 5 milionë fuçi në ditë nga tregjet për të shtyrë çmimet e naftës midis 109 dhe 121 dollarë për fuçi. Kjo është afërsisht e barabartë me nivelet e arritura gjatë luftës në Irak në 2003.

Sipas vlerësimeve bazë të Bankës Botërore, çmimet e naftës pritet të jenë mesatarisht 90 dollarë për fuçi në tremujorin aktual përpara se të bien në një mesatare prej 81 dollarë për fuçi në vitin 2024 ndërsa rritja ekonomike globale ngadalësohet.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.