Deklarata e fortë e Christine Lagarde – “Rivaliteti SHBA-Kinë do të sjellë varfëri të madhe”

Christine Lagarde, paralajmëroi se presioni mbi të gjitha vendet e botës për të zgjedhur nëse do të jenë me Shtetet e Bashkuara të Amerikës apo kundër tyre në anën e Kinës do të rezultojë në më pak rritje ekonomike dhe më shumë varfëri.

Një situatë e tillë duhet shmangur me “të gjitha mjetet” sipas presidentes sëë Bankës Qendrore Europiane. E ftuar për të komentuar mbi presionin në rritje që ka Europa për t’u lidhur ekonomikisht me SHBA ose Kinën dhe për të dhënë mendimin e saj nëse SHBA po humbet hegjemoninë e saj globale, Christine Lagarde u përgjigj shumë prerë. Ajo tha se një botë e ndarë në dy pole do të çojë në një rritje ekonomike më të ulët, më pak prosperitet në mbarë botën dhe më shumë varfëri kudo. Presidentja e BQE-së u shpreh se kjo është diçka që duhet shmangur me çdo kusht, duke pranuar se “ka një konkurrencë të qartë mes këtyre ekonomive të mëdha”.

Duke u mbështetur në përvojën e saj në krye të Fondit Monetar Ndërkombëtar nga viti 2011 deri në 2019, Christine Lagarde tha se shpresonte që SHBA dhe Kina të mund të angazhoheshin në një dialog të ndërsjellë, duke paralajmëruar të dyja fuqitë se tregtia nuk duhet të krijojë terren për konflikte gjeopolitike.

Ajo theksoi se të gjitha këto marrëdhënie, qofshin ato tregti apo politikë, zhvillim ekonomik apo stabilitet financiar, janë rrugë të dyanshme. Për këtë arsye askush nuk mund ta injorojë tjetrin dhe tregtia nuk duhet të jetë konfrontuese duke shtuar se konflikti nuk është i pashmangshëm.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.