Dollari e nis javën në rritje – FED pritet të rrisë normën bazë të interesit me 0.75 pikë përqindje

Dollari amerikan është forcuar në sesionin e parë të kësaj jave, pasi të dhënat pozitive mbi shpenzimet konsumatore në SHBA kanë konfirmuar gjendjen e mire të ekonomisë amerikane dhe kanë zbehur shpresat se Rezerva Federale mund të ngadalësojë hapin e rritjes së interesave.

Përballë jenit japonez dollari është rritur deri në 148, pjesërisht edhe për shkak të vendimit të Bankës së Japonisë për të vijuar me politikat monetare ultralehtësuese. Referuar të dhënave në SHBA, shpenzimet konsumatore u rritën më shumë se parashikimet e analistëve gjatë shtatorit, që sugjerojnë se presioni inflacionist vijon të jetë prezent.

Për këtë arsye, Rezerva Federale pritet të rrisë edhe me 75 pikë bazë normën bazë të interesit, në takimin e kësaj jave. Paundi britanik ka rënë poshtë 1.16 dollarëve, ndërsa gjatë këtij muaji pritet të publikojë fitime prej rreth 4%.

Tashmë, në fokus të tregjeve do të jetë plani ekonomik i kryeministrit të ri të Britanisë së Madhe, Rishi Sunak. Në tregun e kriptomonedhave, bitcoin po tregtohet në rreth 20,500 dollarë, ndërsa ethereum po tregtohet në rreth 1590 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.