FMN dhe Banka Botërore nisin samitet e pranverës – Java do të jetë e mbushur me takime ndërkombëtare

Inflacioni, rritja e tensioneve gjeopolitike dhe rreziqet që lidhen me qëndrueshmërinë financiare. Samitet e zakonshme të pranverës të Bankës Botërore dhe Fondit Monetar Ndërkombëtar, të parashikuara për këtë javë, do të përqendrohen në këto tema

Një periudhë jo optimiste për Fondin Monetar Ndërkombëtar dhe Bankën Botërore, që në prag të samiteve pranverore të kësaj jave, parashikojnë se 90% e ekonomive të zhvilluara do të ngadalësojnë rritjen ekonomike.

Të mërkurën FMN dhe Banka Botërore nisin në Uashington samitet e pranverës ku do të prezantojnë një përditësim të parashikimeve për PBB-në globale në një situatë pasigurie.

Pasi kanë kaluar një situatë të vështirë pas tjetrës, me Covid, luftën në Ukrainë dhe inflacionin, terreni i vështirë nuk ka përfunduar ende sipas drejtoreshës së përgjithshme të FMN-së Kristalina Georgieva. Për pesë vitet e ardhshme rritja globale duhet të ngadalësohet tek 3%, shumë nën mesataren e dy dekadave të fundit ku ndalohej në pragun e 3.8%. Sipas georgievës kjo do të bëjë më të vështirë reduktimin e varfërisë, shërimin e ekonomisë nga plagët e krizës si dhe ofrimin e mundësive më të mira për të gjithë.

Eurozona dhe Shtetet e Bashkuara të Amerikës regjistrojnë gjithashtu një rënie të ritmit të rritjes pasi normat e interesit peshojnë tek kërkesa. Në një kohë që fuqitë aziatike si Kina dhe India që përfaqësojnë gjysmën e rritjes globale 2023-shit, do të kursehen nga ky fenomen.

Me qëllim ftohjen e ekonomisë dhe uljen e normave të inflacionit, Rezerva Federale e SHBA ka zbatuar një sërë rritjesh të normave të interesit duke filluar nga marsi 2022. Gjithsej nëntë rritje që variojnë nga 4.75% në 5%, norma më e lartë në 16 vitet e fundit.

Nga ana e saj, Banka Qendrore Europiane ka rritur normat gjashtë herë që nga korriku 2022 dhe sot qëndron në 3.5%, norma më e lartë që nga viti 2008.

Këto masa, theksoi Georgieva, do të kenë pasoja për rritjen dhe do të vazhdojnë derisa inflacioni të bjerë ndjeshëm. Sipas saj, sektori bankar ka bërë një rrugë të gjatë që nga kriza globale financiare e vitit 2008. Sot, theksoi ajo, bankat janë përgjithësisht më të forta dhe më elastike dhe autoritetet kanë qenë jashtëzakonisht të shpejta dhe efektive në veprimet e tyre në javët e fundit.

Sipas Georgieva, janë tre prioritetet: luftimi i inflacionit dhe ruajtja e stabilitetit financiar; përmirësimi i perspektivave të rritjes afatmesme duke rritur produktivitetin; si dhe nxitja e solidaritetit për të reduktuar pabarazitë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.