Gjermani, etiketa të reja për mishin – Do tregohet mënyra e rritjes dhe ambienti i ushqimit
Gjermania së shpejti do të prezantojë etiketa të reja në paketimet e mishit. Logot bardh’ e zi do të përdorin disa kategori për të informuar klientët në lidhje me kushtet në të cilat janë rritur kafshët, duke përfshirë hapësirën në të cilën janë rritur dhe nëse atyre iu është dhënë akses në natyrë.
Mbështetësit e skemës, përfshirë ministrin gjerman të Bujqësisë Cem Ozdemir, shpresojnë se kjo do të inkurajojë fermerët të rrisin kafshë në kushte më humane.
Ozdemir tha se planifikon të nxjerrë etiketat e para më vonë këtë vit, duke filluar me mishin e freskët të derrit dhe më pas duke u zgjeruar në produkte të tjera të mishit. Etiketa mund të vendoset vullnetarisht në disa produkte të derrit këtë vit, ndërsa do të bëhet e detyrueshme që në vitin 2024.
Ozdemir tha se çdo paketim duhet të tregojë hap pas hapi se si është mbajtur dhe rritur kafsha. Ministri parashikon se fermerët që zgjedhin kushte më të mira do të shpërblehen me çmime më të larta. Etiketimi më i gjerë i bazuar në vendin e origjinës po merret gjithashtu në konsideratë.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.