Gjithnjë e më pak verë – Prodhimi në BE do të ulet me 6% këtë vit

Bashkimi Europian duhet të prodhojë rreth 150 milionë hektolitra verë këtë vit, sipas vlerësimeve të para të Komisionit Europian. Për shkak të kushteve ekstreme të motit dhe sëmundjeve kërpudhore, vreshtat në Itali u shkatërruan këtë vit, duke bërë që vendi të humbasë statusin e prodhuesit më të madh të verës në botë. Në këtë mënyrë pas tetë vitesh Franca kryeson listën e prodhuesve aktualisht.

Ministria franceze e Bujqësisë vlerësoi në fund të javës së kaluar se prodhimi i verës në vend këtë vit do të mbetet në nivelin e vitit të kaluar dhe do të jetë 3% më i lartë se mesatarja pesëvjeçare, që është 46 milionë hektolitra, por me diferenca të mëdha ndërmjet rajoneve.

Komisioni Europian parashikon që Franca do të prodhojë 45 milionë hektolitra verë këtë vit, 1% më shumë se vitin e kaluar. Rimëkëmbja e prodhimit pritet edhe në Gjermani, me një normë rritjeje të vlerësuar prej 16%, falë ujitjes. Pothuajse të njëjtën normë rritjeje shënon edhe Portugalia.

Konsumi i verës, veçanërisht ajo e kuqe, pritet të ulet sërish, me 1.5%, pasi qytetarët po i drejtohen pijeve të tjera, veçanërisht birrës dhe fuqia blerëse e tyre është ulur, thekson Komisioni. Kërkesa e huaj është gjithashtu e dobët, ndoshta për shkak të dobësimit të fuqisë blerëse në disa tregje eksporti dhe stoqeve solide, pas eksporteve rekord në disa tregje në dy vitet e fundit.

Në sezonin 2023/2024 eksporti i verës nga BE-ja mund të mbështetet nga çmime më të ulëta, megjithëse në të njëjtën kohë mund të forcohet konkurrenca e verërave të prodhuara jashtë BE-së në segmentin e verërave më të lira. Importet duhet të ulen sërish, me 4.3% dhe me 18% krahasuar me mesataren pesëvjeçare, në 6 milionë hektolitra.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.