Greqia, sërish në grevë të përgjithshme – Protesta për aksidentin tragjik hekurudhor me 57 viktima

Trenat, anijet, avionët dhe transporti publik janë ndalur në Greqi, ndërsa punëtorët protestojnë për aksidentin më vdekjeprurës hekurudhor në historinë e vendit, si pasojë e të cilit mbetën të vrarë 57 persona më 28 shkurt.

Greva 24-orëshe e organizuar nga sindikatat më të mëdha të sektorit privat dhe publik të Greqisë mbylli gjithashtu disa shërbime publike dhe shkolla shtetërore.

Kjo është e fundit në një seri protestash që nga përplasja e një treni pasagjerësh me më shumë se 350 persona në bord, shumica prej tyre studentë universiteti, me një tren mallrash në rajonin qendror grek të Tempit, pranë Larisës. Punëtorët e hekurudhave kanë organizuar greva të vazhdueshme që nga dita e aksidentit.

Protestuesit, duke akuzuar qeverinë konservatore dhe sistemin politik të vendit për indiferentizëm ndaj thirrjeve të përsëritura nga sindikatat mbi masat e mangëta të sigurisë në hekurudhën greke, organizuan mitingje gjatë ditës jashtë parlamentit.

Ata shprehen se në këtë rast bëhet fjalë për politikat bujare të privilegjeve dhe subvencioneve për pronarët e anijeve, biznesmenët, bankierët dhe monopolet dhe nga ana tjetër janë punëtorët në të gjithë sektorët që vuajnë dhe të drejtat e të cilëve janë vazhdimisht nën sulm. Ata akuzojnë se pushteti nuk ngurron të të sakrifikojë as sigurinë e tyre për hir.

Një hetim gjyqësor për aksidentin ka nisur dhe qeveria është zotuar të modernizojë dhe riparojë plotësisht shërbimet dhe sistemet e trenave.

Por protestuesit nuk besojnë më në premtime. Ata theksojnë se nuk duhej të ndodhte aksidenti tragjik që shteti të vendoste të bënte dicka për gjendjen e hekurudhave. Sipas tyre e gjithë lëvizja e qeverisë në këtë drejtim ka të bëjë me afrimin e zgjedhjeve.

Kryeministri i vendit Mitsotakis, mandati i të cilit përfundon në korrik, ka kërkuar falje për aksidentin dhe ka premtuar të punësojë më shumë staf dhe të rregullojë sektorin e ‘sëmurë’ hekurudhor me mbështetjen e Bashkimit Europian.

Javën e kaluar, dhjetëra mijëra persona u mblodhën në Athinë dhe qytete të tjera anembanë Greqisë në demonstratat më të mëdha në rrugë me të cilat është përballur qeveria që nga ardhja në pushtet në vitin 2019.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.