Hungaria inauguron kreun e ri të shtetit!

Tamas Sulyok është inauguruar si presidenti i ri i Hungarisë pasi paraardhësi i tij dha dorëheqjen pas një skandali të abuzimit me fëmijët.

Sulyok, më parë kreu i Gjykatës Kushtetuese të Hungarisë, u emërua si President nga partia qeverisëse e Hungarisë Fidesz.

Ai u përurua të dielën në një ceremoni përpara Pallatit Sandor në Budapest.

Gjatë fjalës së tij ai tha: “Detyra dhe shërbimi im tani e tutje janë të ndryshme nga ato që kam bërë më parë, por vlerat thelbësore mbeten të njëjta me ato të cilave unë i jam përmbajtur gjithmonë me vendosmëri dhe besnikëri.”

“Si President i Republikës, Ligji Themeltar është gurthemeli, korniza dhe masa e punës sime.

Presidentja e mëparshme e Hungarisë Katalin Novak dha dorëheqjen në shkurt pas protestave publike pasi ajo fali një burrë që ishte dënuar si bashkëpunëtor në një rast të abuzimit seksual të fëmijëve.

Vendimi i diskutueshëm shkaktoi protesta masive dhe kërcënoi fuqinë e pushtetit të Hungarisë Viktor Orban.

“Viti 2024 nuk mund të kishte nisur më keq. Presidentja jonë e Republikës ka paraqitur dorëheqjen në Kuvend. Ky është si një makth dhe po na dëmton të gjithëve”, tha kryeministri hungarez në fjalimin e tij për gjendjen e shtetit në shkurt. “Ne duhet të paraqesim në Asamblenë Kombëtare një paketë të re legjislative për mbrojtjen e fëmijëve.

Sulyok ka qenë gjyqtar i Gjykatës Kushtetuese që nga viti 2014. Pas zgjedhjes së tij si kreu i ri i shtetit të Hungarisë, ai premtoi transparencë në vendimet e tij.

Pavarësisht se ka mbështetjen e partisë në pushtet, opozita e ka kritikuar Sulyok për pak përvojë politike. Një protestë e orkestruar nga katër parti opozitare të dielën e inaugurimit të tij bëri thirrje për zgjedhje të drejtpërdrejta presidenciale.

Roli i presidentit në Hungari është kryesisht ceremonial, ndonëse ata kanë fuqinë t’i dërgojnë projektligjet mbrapsht ligjvënësve ose Gjykatës Kushtetuese për shqyrtim.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.