Italia tërhiqet nga kufiri i taksës së bankave – Për shkak të ruajtjes së stabilitetit financiar, ndërsa kërkon të qetësojë tregjet
Aksionet e bankave italiane rifituan terren të mërkurën pasi qeveria u përpoq të trajtonte trazirat e tregut duke u tërhequr pjesërisht nga taksa e jashtëzakonshme vendosur një ditë më parë për sektorin bankar.
Ministria e Financave tha në një deklaratë se tatimi mbi të ardhurat neto nga interesi do të kufizohej në 0.1 përqind të aktiveve, pa specifikuar saktësisht se çfarë mase do të përdoret. Analistët mendojnë se kufiri do të përgjysmonte ndikimin e pritshëm të taksës. Sipas tyre, kufiri i ri do ta bënte taksën “shumë më të menaxhueshme” dhe do mblidhet rreth 1.8 miliardë euro, në kontrast me vlerësimet e mëparshme që shkonin në mbi 4.5 miliardë euro.
Sipas një projekti fillestar që përcaktonte detajet e taksës, ajo do të kufizohej në 25% të aktiveve neto të bankave, por më pas një version i ri zyrtar, nuk përmendi asnjë kufi, duke shtuar paqartësitë.
Tregjet reaguan të tronditur, duke i çuar aksionet e huadhënësve të mëdhenj italianë, në rënie midis 5.9 dhe 10.% në momentin e mbylljes së tregtimit të martën.
Taksa, e miratuar në një mbledhje të qeverisë të hënën, duhet ende të sigurojë miratimin parlamentar. Nëse ndodh, ajo do të zbatohet për të ardhurat neto nga interesi të krijuara nga diferenca midis normave të kredisë dhe depozitave bankare.
Qeveria tha të martën, se pragu për vendosjen e taksës prej 40%, do të bazohej në diferencën midis të ardhurave neto nga interesi në vitin 2021 dhe shifrës për 2022, ose 2023, cilado qoftë më e madhe. Bankat do të paguanin tatimin, sapo të ardhurat e tyre neto nga interesi për vitin e zgjedhur, të kalonin 2021-shin me 5 ose 10%.
Sipas ekzekutivit, të ardhurat nga kjo taksë do të përdoren për të ndihmuar kredimarrësit në vështirësi.
Dorian Koça/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.