Janari i ngrohtë “mbron” rezervat e gazit – Temperaturat e larta largojnë rrezikun për krizë energjetike

Europa po përballet me janarin më të ngrohtë prej dekadash, duke larguar rreziqet e krizës energjetike. Lajmi konfirmohet nga një analizë e Bloomberg, sipas së cilës kushtet meteorologjike aktuale mundt të zgjasin në të gjithë rajonin deri në fund të muajit. Situata e krijuar automatikisht redukton ndjeshëm kërkesën e energjisë për ngrohje.

Me gazin që ka pësuar një ulje cmimi prej 2% duke shkuar në nivelin e 63.5 euro për megavat orë, analiza e Bloomberg citon parashikimet e shoqërisë “Maxar Technologies”, duke theksuar se pavarësisht shqetësimeve për ndryshimet klimatike, i ngrohti në dy javët e fundit ka qenë një avantazh për vendet që po përballen me një kosto të shtrenjtë jetese, fatura të larta të energjisë dhe rritjen e inflacionit.

Temperaturat duhet të variojnë mes 2 dhe 5 gradë më të larta në krahasim me mesataren e sezonit në Francë dhe Gjermani deri në gjysëm të muajit. Në Mbretërinë e Bashkuar që regjistroi vitin më të nxehtë të saj në 2022-shin, ka mundësi që temperaturat të jenë të qëndrueshme në nivelin aktual deri në fund të muajit janar.

Për Europën gjysma e parë e këtij muaji mund të jetë më e nxehta e regjistruar ndonjëherë në dekadat e fundit. Bëhet fjalë për një kthesë të konsiderueshme tendence në krahasim me temperaturat e acarta të fillimit të dhjetorit. Këto të fundit u bënë shkak për shqetësime rreth rezervave të gazit natyror, me qeveritë dhe konsumatorët që në verë frikësoheshin për një ndërprerje të furnizimit me energji, pas reduktimeve të konsiderueshme të furnizimeve me gaz nga Rusia si pasojë e luftës në Ukrainë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.